La regenza grischuna ha elegì Fulvio A. Bottoni sco nov cusseglier da banca per la banca chantunala grischuna. Per il 1. d'avrigl 2016 daventa el successur da Franco Quinter. Il cusseglier da banca vertent Fabrizio Keller daventa nov vicepresident da la banca.
Tenor la lescha davart la banca chantunala grischuna (BCG) è la regenza cumpetenta per eleger il cussegl da banca che sa cumpona da set persunas. Ils 31 da mars 2016 finescha la perioda d'uffizi dal cusseglier da banca Franco Quinter (commember dal cussegl da banca dapi l'onn 2003). El ha cuntanschì la limitaziun dal temp d'uffizi prescritta da 12 onns e sto vegnir remplazzà. Suenter l'extrada dal vicepresident vertent da la banca Peter Wettstein, che vegn remplazzà en il cussegl da banca a partir dal 1. d'avrigl 2016 tras Martin Gredig, sto la regenza plinavant tscherner il vicepresident da la banca.
La funcziun dal vicepresident da la banca surpiglia da nov il cusseglier da banca en uffizi Fabrizio Keller per il rest da sia perioda d'uffizi fin ils 31 da mars 2018. Fabrizio Keller è dapi 10 onns commember dal cussegl da banca e fa part da la cumissiun da revisiun. El è advocat e possessur d'in biro d'advocatura e da notariat a Grono.
Nov cusseglier da banca daventa Fulvio A. Bottoni da Zizers. El è vegnì elegì da la regenza per la perioda d'uffizi dal 1. d'avrigl 2016 fin ils 31 da mars 2020. Tras l'elecziun da Fulvio A. Bottoni vegn fatg in ulteriur pass en la renovaziun dal cussegl da banca ch'è vegnida instradada.
Fulvio A. Bottoni ha 48 onns ed è burgais da Brusio. El è maridà ed abita cun sia famiglia a Zizers. Suenter la scola primara e secundara a Vicosoprano ed a Stampa ha el fatg l'onn 1986 il diplom da commerzi a la scola chantunala grischuna a Cuira e terminà l'onn 1992 la scola auta d'economia e d'administraziun cun il diplom d'econom da manaschi SAS. L'onn 2000 ha el fatg il diplom sco expert da facturaziun e controlling e l'onn 2011 il master en "banking and finance" a la scola auta da scienzas applitgadas Turitg (ZHAW).
Fulvio A. Bottoni è vegnì elegì sin fundament da sia experientscha cumprovada da blers onns en la scienza ed en la pratica sco expert da finanzas. En il rom da sias activitads d'enfin ussa, tranter auter sco revisur e controllader en l'economia privata u sco professer per contabilitad e controlling, ha el acquistà enconuschientschas profundas da l'economia da bancas e dal management da las ristgas. Vitiers vegnan er experientschas sco cusseglier d'administraziun. Oz è Fulvio A. Bottoni professer e manader dal studi "BSc en economia da manaschi" a la scola auta da tecnica ed economia Cuira.
La renovaziun dal cussegl da banca ch'è adina puspè necessaria ademplescha las prescripziuns da l'autoritad federala per la surveglianza dals martgads da finanzas (FINMA) ed il profil d'exigenzas da la regenza per il cussegl da banca. L'onn 2013 ha la regenza repassà las pretensiuns envers il cussegl da banca sco unitad, envers ses singuls commembers ed envers il presidi da la banca ed ha adattà questas pretensiuns a las prescripziuns dal dretg da surveglianza.
Fotografia agiuntada:
Fulvio A. Bottoni
Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas dal Grischun, tel. 081 257 32 01, e-mail
Barbara.Janom@dfg.gr.ch
Gremi: regenza
Funtauna: rg chanzlia chantunala dal Grischun