La regenza grischuna ha deliberà il rapport davart la finanziaziun dals ospitals e da la tgira en il chantun Grischun per mauns dal cussegl grond. Il rapport examinescha la finanziaziun actuala dals ospitals e da la tgira. El mussa las mancanzas en il sistem da finanziaziun dad oz e propona differentas mesiras per eliminar quellas. Il sistem vertent da la finanziaziun cuminaivla dals ospitals e da la tgira tras il chantun e tras las vischnancas duai vegnir mantegnì.

Cun l'incumbensa da la cumissiun per sanadad e fatgs socials (CSF) ch'è vegnida acceptada dal cussegl grond en la sessiun d'october 2011 è la regenza vegnida incumbensada d'examinar detagliadamain il sistem existent da la finanziaziun dals ospitals e da la tgira e da far in rapport en chaussa. En quest connex duevan en spezial vegnir controlladas las regulaziuns en las ordinaziuns concludidas da la regenza che chatschan ad aut ils custs. Ultra da quai dueva la regenza mussar, sut tge premissas e cun tge consequenzas ch'ina finanziaziun dals ospitals sulettamain tras il chantun ed ina finanziaziun da la tgira unicamain tras las vischnancas pudess vegnir realisada en il futur, sche las instituziuns responsablas restan las medemas.

Sa basond sin in'expertisa fatga d'ina interpresa da cussegliaziun externa constatescha la regenza che las regulaziuns en l'ordinaziun tar la lescha da sanadad sco er en l'ordinaziun tar la lescha per promover la tgira da persunas malsaunas èn concepidas en moda adequata en cumparegliaziun cun ils auters chantuns da la Svizra orientala e che talas na chatschan betg ad aut ils custs. Tenor l'expertisa han percunter las instituziuns responsablas u las vischnancas pussaivladads d'influenzar e da diriger ils custs en la tgira da lunga durada, e quai en il sectur da la dotaziun e da la cumposiziun professiunala dal persunal da tgira. L'expertisa cuntegna ultra da quai in model per ina planisaziun separada dal sectur dals ospitals tras il chantun e dal sectur da la tgira da lunga durada e da la spitex tras las vischnancas.

La regenza propona da mantegnair la finanziaziun existenta maschadada tras il chantun e tras las vischnancas en il sectur dals ospitals sco er en il sectur da la tgira ed assistenza ambulanta e staziunara. Ella sa basa en quest connex sin in giudicament ch'ella ha fatg sezza. Quel cuntegna las premissas per ina separaziun da las cumpetenzas en la finanziaziun dals ospitals e da la tgira, las consequenzas d'ina separaziun sco er la valitaziun da las fermezzas e da las deblezzas. La regenza renviescha al fatg che las enconuschientschas ch'èn necessarias per ina separaziun e l'experientscha correspundenta n'èn betg avant maun tar las vischnancas. Plinavant tegna la regenza quint da la circumstanza ch'er ina separaziun da las cumpetenzas per la finanziaziun dals ospitals e da la tgira na chaschunass betg ina separaziun cumplessiva da la finanziaziun generala. Quai perquai che er, sche unicamain las vischnancas fissan responsablas per la finanziaziun da las chasas da dimora e da la spitex, vegnissan las chasas da dimora confinanziadas tras il chantun sur prestaziuns supplementaras.

La regena demussa en il rapport che la regulaziun vertenta da la finanziaziun da la tgira ha intginas mancanzas. Las mancanzas inditgadas duain vegnir eliminadas tras differentas mesiras. Latiers tutga en spezial ina revisiun parziala da la lescha per promover la tgira da persunas malsaunas. Il rapport duai vegnir tractà dal cussegl grond durant la sessiun da zercladur 2016.


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail: Christian.Rathgeb@djsg.gr.ch  


Gremi: regenza
Funtauna: rg chanzlia chantunala dal Grischun