4 da 10 studentas e students dals secturs matematica, informatica, scienzas natiralas e tecnica bandunan il chantun Grischun suenter il diplom. Quai mussa in studi da l'uffizi federal da statistica. A quest trend vuless l'uffizi per economia e turissem far frunt cun l'event da "trampolin".

Glindesdi, ils 18 d'avrigl 2016, sa scuntran gia per la 10. giada studentas e students da differentas scolas autas e patrunas e patruns dal chantun Grischun. En il center da l'event da "trampolin" stat la lavur cuminaivla en lavuratoris che vegnan realisads directamain tar las interpresas. En quest connex preschentan interpresas regiunalas a las studentas ed als students ina sfida actuala da lur secturs da fatschenta. En in segund pass vegnan elavuradas cuminaivlamain propostas da soluziuns innovativas. Las studentas ed ils students pon dar uschia in sguard unic davos las culissas da las interpresas. Tar l'apero da talent pon las studentas ed ils students alura s'infurmar davart lur perspectivas da carriera e stabilir contacts cun patrunas e patruns potenzials.

Organisaziun cun ina vasta basa
Ils incumbensaders da l'event da "trampolin" èn l'uffizi per economia e turissem sco er l'uffizi per la furmaziun media-superiura, la SATE a Cuira e la Graduate school dal Grischun. La sponsura principala è dapi il cumenzament la banca chantunala grischuna.

Las suandantas interpresas sa preschentan a l'event da "trampolin" GR:

• center d'innovaziun INNOZET
• CSEM Landquart
• Ovras da Domat SA
• Georg Fischer Rohrleitungssysteme SA
• Graduate school dal Grischun
• GRITEC SA
• banca chantunala grischuna
• Hamilton Bonaduz SA
• Inventx SA
• Pöyry Infra SA Grischun
• PwC
• Repower SA
• Trumpf Grüsch SA
• VZ VermögensZentrum SA

Ins po anc s'annunziar
L'event da "trampolin" GR è in da totalmain 7 events da "trampolin" en Svizra ed ha lieu glindesdi, ils 18 d'avrigl 2016. Studentas e students interessads pon anc s'annunziar per l'event da "trampolin" fin dumengia, ils 10 d'avrigl 2016.

Ulteriuras infurmaziuns ed annunzia sut: www.sprungbrett-events.ch  

Infurmaziun per las collavuraturas e per ils collavuraturs da las medias
Nus As envidain d'accumpagnar medialmain l'occurrenza. En quest connex As sustegna l'uffizi per economia e turissem gugent a purtretar ina studenta u in student ubain ina interpresa che sa participescha a l'event da "trampolin".


Infurmaziuns:
Paolo Giorgetta, svilup da l'industria locala, uffizi per economia e turissem, tel. 081 257 23 75, e-mail: Paolo.Giorgetta@awt.gr.ch


Gremi: uffizi per economia e turissem
Funtauna: rg uffizi per economia e turissem