Cun l'act tradiziunal da l'emprima siglientada per il tunnel Val Pischöt da circa 325 meters lunghezza cumenzan oz las lavurs da construcziun da la part centrala da la renovaziun da la via da Samignun. Igl è previs da metter en funcziun il tunnel il tard atun 2017. Quest tunnel permetta da meglierar marcantamain la segirezza dal traffic e la segirezza d'enviern da l'unica colliaziun cun Samignun che sa chatta sin territori svizzer.

La via da Samignun collia l'Engiadina bassa cun la vallada da Samignun. La substanza architectonica da questa via chantunala da colliaziun deriva per gronda part anc dal cumenzament dal 20. tschientaner ed è vegnida renovada e reparada dapi lura mo punctualmain. Cunzunt en il sectur da la galaria actuala Val Pischöt n'ademplescha la via betg pli las pretensiuns dad oz, e quai areguard la ladezza e la geometria. En quest sectur è la via ultra da quai exposta a privels da la natira e sto vegnir serrada durant l'enviern pervia da lavinas mintgamai per plirs dis.

Il nov tunnel Val Pischöt vegn a sviar il traject da via actual da la vart da la muntogna, uschia che la segirezza dal traffic e dal manaschi èn augmentadas ed uschia ch'i po vegnir obtegnì in trassé da la via cuntinuant. La perforaziun dal tunnel vegn ad esser la lavur principala. Il cumenzament da las lavurs dals miniers vegn celebrà tradiziunalmain oz cun l'act da l'emprima siglientada.

Il tunnel vegn ad avair ina pendenza longhitudinala dad 8,6 pertschient ed ina pendenza traversala da maximalmain 5 pertschient. Cun ina ladezza dal vial da 5,80 meters e cun in'autezza interna da 4,5 meters po il tunnel vegnir charrà en il futur en omaduas direcziuns. Tenor il preventiv importan ils custs per il project d'engrondiment cun ina lunghezza totala da 510 meters circa 16 milliuns francs.

Galaria vertenta Val Pischöt