La regenza è cunter ina spartiziun da l'uvestgieu da Cuira
La regenza grischuna ha prendì posiziun tar l'enquista da l'uvestgieu da Cuira concernent in "uvestgieu da Turitg" ed in "uvestgieu da la Svizra originara". La corporaziun catolic-romana dal chantun Turitg ha lantschà da nov la discussiun davart in'eventuala creaziun d'in "uvestgieu da Turitg". Per sa pudair far in meglier maletg da las differentas tenutas envers in "uvestgieu da Turitg" (territoris dal chantun Turitg) e – sco cumplettaziun da quai – envers in eventual "uvestgieu da la Svizra originara" (territori dals chantuns Uri, Sviz, Sursilvania e Sutsilvania) ha l'uvestg da Cuira Vitus Huonder laschà far in'enquista.
La regenza è da l'avis ch'ina spartiziun da l'uvestgieu da Cuira avess per consequenza ch'il uvestgieu vegniss indeblì e marginalisà sensiblamain. Quai aveva ella punctuà gia en il rapport davart la finanziaziun da las baselgias en il chantun Grischun sco er en ina brev a l'anteriur uvestg Amédée Grab. La regenza ha ina tenuta sceptica fin refusanta enves il fatg ch'il num "Turitg" vegnia menziunà explicitamain en la designaziun da la diocesa ("uvestgieu Cuira-Turitg"). Ultra da quai aveva ella communitgà gia quella giada ch'il chantun Grischun vegnia a sa dustar vehementamain che la sedia da l'uvestg vegnia eventualmain transferida a Turitg.
L'uvestgieu da Cuira porta ses num dapi sia creaziun il 5. tschientaner. Malgrà differentas midadas da las relaziuns territorialas n'è el mai vegnì mess en dumonda. Cun il num da l'uvestgieu da Cuira vegni exprimì cleramain che la sedia da l'uvestg sa chatta en la chapitala dal chantun Grischun. Questa situaziun pertutgant la sedia ed il num che datescha da tschientaners na duai betg vegnir midada.

La regenza ha approvà il project d'exposiziun per la correcziun da la ruta dal Partenz, traject "Staziun Landquart – punt da Tardis". Il chantun Grischun sa participescha cun maximalmain 856 000 francs al project.
La ruta dal Partenz VL21 è ina ruta da velos regiunala che collia las vischnancas da Claustra e da Sargans ina cun l'autra. La nova colliaziun da la via da velos cuntegna differentas parts da project. Ella cumenza tar la rundella da l'access a Landquart ost cun il sutpassadi sut la N13 e maina alura sur in surpassadi da la Industriestrasse. Alura suonda ella parallelamain l'Industriestrasse avant ch'ella traversa la Landquart e l'access a la serenera da Landquart cun ina nova punt per velos. Là sbucca ella en la ruta dal Rain. Ils custs totals dal project importan 1,69 milliuns francs.

Via da velos "Staziun Landquart – punt da Tardis"

L'administraziun sa participescha a l'acziun "Bike to Work"
L'administraziun chantunala sa participescha l'onn 2016 danovamain a l'acziun "Bike to Work" da la Pro velo Svizra. La regenza ha surdà l'organisaziun a l'uffizi da sanadad. En il rom da questa acziun vegnan las collavuraturas ed ils collavuraturs envidads da sa participar ad in'equipa da quatter e da prender il velo per ir a lavurar, e quai durant almain la mesadad dals dis da lavur dal mais da zercladur. Pussaivla è er ina cumbinaziun da traffic public e velo. A chaschun da l'acziun da l'onn passà han 78 equipas da l'administraziun chantunala cun stgars 311 participantas e participants fatg tut en tut var 43 444 kilometers.