Per schliar la situaziun difficila da la centrala dal clom d'agid sanitar 144 (centrala 144) a Glion èn vegnidas prendidas mesiras immediatas a chaschun d'ina scuntrada cuminaivla da l'ospital regiunal da la Surselva, dal chantun e da la centrala 144. L'intent è quel d'integrar la centrala 144 en la centrala d'acziuns 117 da la polizia chantunala.

Il president da la regenza Christian Rathgeb ha – ensemen cun il schef da l'uffizi da sanadad Rudolf Leuthold, cun il secretari dal departament Gion Claudio Candinas e cun la collavuratura ch'è responsabla per ils fatgs da salvament tar l'uffizi da sanadad Sabine Weiss – fatg ina inspecziun da la centrala 144 mesemna, ils 4 da matg 2016. Preschents en stads il president da l'ospital regiunal Mathias Bundi sco er commembers da la direcziun da l'ospital regiunal e collavuraturas e collavuraturs da la centrala 144. La discussiun tranter il chantun e las persunas responsablas da l'ospital sco er cun il team da la centrala 144 davart soluziuns pussaivlas è stada constructiva.

Igl ha stuì vegnir constatà che la situaziun da la centrala 144 è fitg difficila (desditga dal manader sco er da la substituziun) e che mesiras a curta vista èn urgentamain necessarias. A partir d'immediat vegn Sabine Weiss messa a disposiziun ad interim a l'ospital regiunal per manar la centrala 144 en enclegientscha cun las persunas responsablas per l'ospital e cun il team da la centrala 144.

Las difficultads dal persunal han mussà ch'i na pon betg vegnir chattadas avunda persunas dal fatg adattadas a Glion per manar la centrala 144. Ultra da las sinergias concernent las localitads e la tecnica s'impona per il futur er en quest reguard ina integraziun da la centrala dal clom d'agid sanitar 144 en la centrala d'acziuns 117 da la polizia chantunala. In transferiment da la centrala 144 il proxim temp a Cuira e sia integraziun en la centrala d'acziuns 117 èn pia inevitabels areguard il persunal e correspundan ultra da quai ad ina tendenza naziunala da fusiunar centralas d'acziun (sco p.ex. en ils chantuns SG e TG). La tschertga actuala da persunal sa focussescha perquai a media vista sin Cuira sco lieu da staziunament.


Infurmaziuns:
- president da la regenza Christian Rathgeb, schef dal departament da giustia, segirezza e sanadad, telefon 081 257 25 01
- Mathias Bundi, president da l'ospital regiunal da la Surselva, 081 925 33 55


Gremi: departament da giustia, segirezza e sanadad
Funtauna: rg departament da giustia, segirezza e sanadad