La regenza grischuna ha inoltrà l'annunzia per la procedura naziunala da nominaziun per ina candidatura da la Svizra per ils gieus olimpics d'enviern e per ils paralimpics 2026. Uschia pussibilitescha ella al team da project ch'è vegnì nominà da l'uniun "Olimpia Grischun 2026" da sa participar als lavuratoris che vegnan realisads da Swiss olympic.

Tgi che vuless prender part a la procedura naziunala da nominaziun per ils gieus olimpics d'enviern e per ils paralimpics 2026 sto inoltrar ina decleraziun d'intenziun a Swiss olympic fin ils 31 da matg 2016. Questa decleraziun d'intenziun sto vegnir sustegnida uffizialmain d'ina regenza. Ultra da quai vegn incassada ina contribuziun da 25 000 francs als custs d'administraziun. La regenza grischuna ha tramess l'annunzia da l'uniun "Olimpia Grischun 2026" ensemen cun sia brev da sustegn a Swiss olympic ed assegnà la contribuziun necessaria.

Elavuraziun dal dossier tras las organisaziuns da tetg da l'economia grischuna
Las organisaziuns da tetg da l'economia grischuna han fundà l'uniun "Olimpia Grischun 2026" sco instituziun responsabla. Quella ha incumbensà il team da project che stat sut la direcziun dad Andreas Wieland d'elavurar in dossier per s'annunziar per ils gieus olimpics d'enviern 2026. L'infrastructura existenta sco er il know-how ch'è avant maun en il Grischun areguard l'organisaziun ed areguard la realisaziun d'occurrenzas grondas duain vegnir duvrads. Cun ina repartiziun decentrala da las infrastructuras, er en lieus extrachantunals, po la persistenza dal project vegnir influenzada en moda positiva. Durant las proximas emnas sto vegnir sviluppà vinavant il concept general ch'è vegnì elavurà dal team da project. Quai resguardond ils resultats dals lavuratoris che vegnan realisads da Swiss olympic.

Incumbensa dal cussegl grond
Il dossier vegn elavurà sin basa da l'incumbensa Cavegn concernent il sustegn d'ina candidatura per ils gieus olimpics d'enviern 2026, ch'il cussegl grond ha surdà a la regenza grischuna il december 2015. En sia resposta a l'intervenziun era la regenza sa declerada pronta da sustegnair l'economia grischuna tar l'elavuraziun d'ina candidatura dal Grischun per gieus olimpics d'enviern. La regenza è da l'avis ch'i saja tuttavia legitim d'examinar ina nova annunzia. Quai cun resguardar las prescripziuns che Swiss olympic e la confederaziun fan areguard talas candidaturas.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials dal Grischun, tel. 081 257 23 01, e-mail: Jondomenic.Parolini@dvs.gr.ch


Gremi: regenza
Funtauna: rg chanzlia chantunala dal Grischun