La regenza ha salvà l'onn 2016 sia sesida champestra en la part sura da la Surselva ed ha visità en quest connex ils stabiliments militars en la Val Medel sco er la claustra da Mustér. Ultra da quai ha ella dà in'egliada al center d'asil a Mustér ch'è vegnì avert da nov.

La finamira da la sesida champestra da la regenza è stada quella da survegnir ina invista dals stabiliments militars da la Val Medel, nua che la confederaziun ha investì dacurt var 40 milliuns francs e porscha numerusas plazzas da lavur. Il president da la regenza Christian Rathgeb ha engrazià il departament federal da defensiun, protecziun da la populaziun e sport (DDPS) en num da la regenza per ses ferm confess per il Grischun respectivamain per la Val Medel sco lieu per il militar svizzer. La visita ed il gentar cuminaivel en la claustra da Mustér, als quals l'avat Vigeli Monn ha envidà, han servì al barat en differents secturs. La regenza ha pudì sa laschar infurmar davart il manaschi da la claustra e da la scola claustrala ed ha pudì dar in'egliada a las lavurs da restauraziun da la baselgia. Il sguard en il center da transit da Mustér ha servì a survegnir ina invista dal manaschi dal center, ed a discutar dumondas actualas da la concepziun dal center ed a sa laschar infurmar da la manadra dal center, Marianne Röthlisberger, davart il cumenzament dal manaschi dal center. La regenza è vegnida accumpagnada sin sia sesida champestra dals presidents communals Francestg Cajakob (Mustér) e Peter Binz (Medel).


Infurmaziuns:
president da la regenza Christian Rathgeb, schef dal departament da giustia, segirezza e sanadad dal Grischun, tel. 081 257 25 01, e-mail: Christian.Rathgeb@djsg.gr.ch  


Gremi: regenza
Funtauna: rg chanzlia chantunala