La conferenza da las scheffas e dals schefs da las regenzas da la cuminanza da lavur da las regiuns alpinas (ARGE ALP) ha deliberà trais resoluziuns oz a Bezau, Vorarlberg. Las scheffas ed ils schefs da las regenzas han discutà ils temas crisa da fugitivs, occupaziun e protecziun dal clima en il territori alpin. Sco commember da la ARGE ALP sustegna il chantun Grischun las resoluziuns ch'èn vegnidas deliberadas oz. Da nov surpiglia il stadi liber tudestg da la Baviera il presidi da la ARGE ALP.

A chaschun da lur conferenza da quest onn a Bezau han las scheffas ed ils schefs da las regenzas dals pajais da las Alps deliberà la resoluziun "Dumagnar las sfidas da la crisa da fugitivs en il territori alpin". Necessarias èn stentas cuminaivlas per diriger e per reducir en moda efficazia l'affluenza da persunas en il territori da la ARGE ALP. La ARGE ALP pretenda perquai da l'Uniun europeica da sviluppar e da realisar ina strategia ed in fasch da mesiras effectivas per quest intent. Latiers tutgi tranter auter da segirar en moda pli effectiva il cunfin exteriur da la UE e d'endrizzar a medem temp centers da registraziun. Ultra da quai pretenda la ARGE ALP in sistem permanent che permetta da reparter la responsabladad per ils numerus fugitivs en moda solidarica sin tut ils stadis. Ils parameters decisivs per la repartiziun sin ils singuls stadis commembers da l'Uniun europeica pudessan per exempel esser mintgamai il dumber da las abitantas e dals abitants e la forza economica d'in stadi sco er la prestaziun da recepziun fin ussa. Per evitar da princip la migraziun da fugitivs ston vegnir prevegnids ils motivs da la fugia. Sin plaun internaziunal èn necessarias mesiras sistematicas che mettan ina fin als conflicts armads ed a la persecuziun politica en ils pajais da derivanza. Ultra da quai ston vegnir sustegnidas las organisaziuns ch'èn activas en la cooperaziun al svilup, che pon gidar a meglierar las cundiziuns generalas socialas ed economicas en ils pajais da derivanza. Qua vesan er ils pajais ed ils chantuns da la ARGE ALP lur obligaziun da metter accents correspundents en lur cooperaziun al svilup.

In'ulteriura resoluziun ch'è vegnida deliberada a chaschun da la conferenza da las scheffas e dals schefs da las regenzas da la cuminanza da lavur da las regiuns alpinas pertutga il tema "Occupaziun en il territori alpin: stgaffir dapli e meglras plazzas da lavur".
Cunzunt las interpresas pitschnas e mesaunas èn la pitga principala da l'economia da las regiuns da la ARGE ALP. Questas interpresas ston vegnir distgargiadas dals custs d'administraziun exagerads. Las scheffas ed ils schefs da las regenzas da la ARGE ALP s'engaschan perquai per far frunt a la birocrazia excessiva en lur sectur da cumpetenza. La terza resoluziun ch'è vegnida deliberada s'occupa da la politica da protecziun dal clima orientada al futur per il territori alpin. Il territori alpin duai daventar ina regiun exemplarica per l'effizienza energetica e per las energias regenerablas. Ultra da quai sa tracti da rinforzar las cooperaziuns transcunfinalas en il sectur dal traffic public, da transferir il traffic da rauba sin la viafier e da procurar che las destinaziuns turisticas sajan cuntanschiblas meglier sin vias ch'èn favuraivlas al clima.

Plinavant han las scheffas ed ils schefs da las regenzas dals pajais da las Alps fixà ils puncts centrals per la direcziun strategica futura da la ARGE ALP. La ARGE ALP è "la represchentanza dals interess per temas da las Alps". Las regiuns commembras duain coordinar lur interess politics cun temas specifics da las Alps ed inoltrar quels cuminaivlamain sin plaun naziunal ed europeic. Ultra da quai duai la ARGE ALP realisar projects cun in effect duraivel, ch'èn drizzads pli ferm vers temas ch'èn relevants per il futur. Tras sias activitads vul la ARGE ALP er obtegnair in niz concret per la populaziun. Quella duai gidar a meglierar l'identificaziun cun il territori alpin ed uschia definir l'identitad.

Projects grischuns
Sco uniun transcunfinala da diesch stadis federativs, regiuns e chantuns or da quatter pajais permetta la ARGE ALP projects cuminaivels multifars en il territori alpin. In project da success sut la direcziun dal Grischun è "ARGE ALP sport". L'onn passà han participà stgars 1895 sportistas e sportists a las nov concurrenzas che han gì lieu en l'entir territori alpin. Il segund project grischun actual s'occupa da dumondas davart l'influenza da la schelira permanenta sin bovas e sin crudada da grippa. Ils resultats dal project vegnan preschentads l'onn 2017.

A Bezau èn er naschids novs projects sco per exempel in project per eruir l'influenza che sfessas a l'ur da glatschers han sin crudadas da grippa, in project concernent in portal da retschertga cuminaivel dals archivs da la ARGE ALP sco er il project "Academia europeica da talents 2017".

Premi da la ARGE ALP 2016: "Projects innovativs en il sectur da l'occupaziun"
Oz è er vegnì surdà a Bezau il premi da la ARGE ALP 2016. Il premi da la ARGE ALP da quest onn vul render attent a la publicitad il territori alpin sco regiun innovativa cun tradiziun ed intimar anc dapli da far cooperaziuns en il territori alpin. Da tut ils pajais, las regiuns ed ils chantuns da la ARGE ALP èn vegnids inoltrads projects innovativs en il sectur da l'occupaziun. Ina giuria internaziunala ha fatg la premiaziun. Il project "Mia Engiadina" dal Grischun ha gudagnà in premi da renconuschientscha en la valur da 1000 euro.

Fotografia agiuntada: La cussegliera guvernativa Barbara Janom Steiner gratulescha a Not Carl che ha survegnì il premi da la ARGE ALP per il project "Mia Engiadina".


Infurmaziuns:
- cussegliera guvernativa Barbara Janom Steiner, scheffa dal departament da finanzas e vischnancas dal Grischun, e-mail: Barbara.Janom@dfg.gr.ch (ella telefona lura enavos)

- Dumondas da las medias per telefon: Tamara Kobler, incumbensada per l'infurmaziun dal chantun Grischun, tel. 079 792 19 37


Gremi: ARGE ALP / regenza dal chantun Grischun
Funtauna: rg chanzlia chantunala dal Grischun