Il program d'interreg "Italia–Svizra" promova la collavuraziun transcunfinala tranter las quatter regiuns talianas ed ils trais chantuns svizzers Grischun, Tessin e Vallais. Er il chantun Grischun intensivescha sias activitads e sa participescha cun var 3,36 milliuns francs al program.

Il chantun Grischun dovra partenadis internaziunals ferms. Per quest motiv è il chantun interessà d'intensivar en general la collavuraziun cun l'Italia per sviluppar ils spazis economics da tuttas duas varts dal cunfin. La furmaziun da raits ed il rinforzament da la cumpetitivitad da las regiuns da cunfin èn d'ina impurtanza centrala en quest connex. In instrument per promover questa collavuraziun è il program d'interreg "Italia–Svizra", entaifer il qual las colliaziuns dal Grischun cun il Tirol dal sid e cun la provinza da Sondrio sco er cun lur territoris cunfinants han ina impurtanza particulara. La contribuziun dal chantun Grischun per projects importa 3,36 milliuns francs.

Ils temas ed uschia ils secturs da promoziun dal program d'interreg "Italia–Svizra" èn l'augment da la cumpetitivitad da las interpresas, la valurisaziun dal patrimoni cultural e natiral, ina mobilitad integrada e duraivla, l'integraziun sociala sco er la collavuraziun sin plaun administrativ. En quests secturs po il chantun conceder contribuziuns a projects, sch'ils projects gidan a promover il svilup economic dal chantun u a rinforzar las relaziuns internaziunalas.

Grond interess per la collavuraziun transcunfinala
A chaschun d'ina occurrenza iniziala che ha gì lieu la fin da zercladur 2016 a Milaun per incumbensa dals set partenaris dal program, ha l'autoritad administrativa taliana infurmà en moda fundada e detagliada ils purtaders da projects interessads davart ils temas e davart ils cuntegns dal program sco er davart la pussaivladad d'inoltrar projects. Numerus represchentants d'organisaziuns e d'instituziuns grischunas demussan actualmain in grond interess per la collavuraziun transcunfinala e per la pussaivladad da sa participar activamain ad ideas da projects.

Las gruppas en mira – ed uschia las purtadras pussaivlas per realisar projects d'interreg – èn cunzunt las vischnancas e las regiuns grischunas da cunfin, organisaziuns turisticas, instituziuns da l'economia, da la furmaziun, da la sanadad, da la cultura e dal traffic public dal Grischun sco er federaziuns ed uniuns en la vischinanza dal cunfin. Cun lur participaziun al program d'interreg e cun lur iniziativa a favur da la realisaziun da projects pon quests gremis prestar ina contribuziun per rinforzar la collavuraziun internaziunala dal chantun Grischun.
Ils emprims projects pon vegnir inoltrads fin ils 15 da settember 2016.

Ulteriuras infurmaziuns: www.interreg-italiasvizzera.eu


Infurmaziuns:
Eugen Arpagaus, manader da l'uffizi per economia e turissem, telefon 081 257 23 77, E-mail: Eugen.Arpagaus@awt.gr.ch


Gremi: uffizi per economia e turissem
Funtauna: rg uffizi per economia e turissem