Las precipitaziuns intensivas dals 16 als 17 da zercladur 2016 han chaschunà ina bova sin il traject Plan dal Tor da la via da Viano. Per che las ulteriuras lavurs da segirada, da rumida e da reparaziun possian vegnir cuntinuadas, sto vegnir siglientada grippa en il lieu.

Las precipitaziuns intensivas la notg dals 16 als 17 da zercladur 2016 han chaschunà ina bova da circa 75 – 100 meters cubic sur la via chantunala tranter Ginet e Viano. Malgrà che la rait existenta cunter crudada da crappa ha pudì retegnair ina part da la crappa, èn var 30 meters cubic material arrivads sin plirs trajects da la via da Viano. Perquai ch'i smanatschan dapi lura crudadas da crappa durant la notg, ha la via chantunala stuì vegnir serrada. Igl exista in sviament signalisà sur Selvaplana (via da guaud).

Suenter in giudicament geologic e suenter l'elavuraziun d'in concept da segirada correspundent, han cumenzà l'emna passada las lavurs da segirada per rumir la crappa. En il fratemp èn las lavurs progredidas uschenavant, ch'ils grips che pudessan crudar giu, pon vegnir siglientads probablamain gievgia, ils 7 da fanadur 2016. La siglientada principala ha lieu circa a las 06.50. Suenter la controlla posteriura tras il team da siglientada e suenter eventualas siglientadas posteriuras pli pitschnas po vegnir cumenzà cun il nettegiament sco tal da la spunda. Ils grips vegnan siglientads durant ch'ils trens da la Viafier retica na circuleschan betg sin il traject. Il territori vegn segirà e serrà preventivamain lunsch enturn.

La reparaziun da la rait cunter crudada da crappa donnegiada sco er las lavurs da rumida e da reparaziun vi da la via da Viano vegnan a durar previsiblamain anc var 4 emnas.

Fotografia agiuntada:

La crudada da crappa sin la via da Viano ils 17 da zercladur 2016 (fotografia UGP dal Grischun)


Infurmaziuns:
Elia Lardi, responsabel per las medias, uffizi da construcziun bassa dal Grischun, tel. 081 257 37 10; e-mail Elia.Lardi@tba.gr.ch


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun