La cumissiun dal cussegl grond per sanadad e fatgs socials (CSF) ha predeliberà las missivas da la regenza tar la revisiun totala da la lescha da sanadad, tar la revisiun parziala da la lescha dal persunal e tar la revisiun parziala da la lescha chantunala da sustegn. Ils projects che han tuts chattà il sustegn da la cumissiun vegnan tractads en la sessiun d'avust 2016 dal cussegl grond.

Revisiun totala da la lescha da sanadad
La cumissiun per sanadad e fatgs socials ha predeliberà la missiva da la regenza al cussegl grond tar la revisiun totala da la lescha da sanadad. La fatschenta è vegnida manada da deputada Erika Cahenzli-Philipp, sa participà è er il president da la regenza Christian Rathgeb. La necessitad d'ina revisiun totala n'è betg stada en discussiun per la cumissiun, uschia ch'ella è entrada unanimamain en il project.

En la tractativa detagliada ch'è s'extendida sur trais dis, ha la cumissiun fatg intginas correcturas formalas vi dal sboz da la lescha. Materialmain propona ina maioritad da la cumissiun da schluccar la protecziun da las nunfimadras e dals nunfimaders (admetter manaschis per fimadras e fimaders) sco er d'abolir l'obligatori d'in post da mediaziun per las chasas da tgira. La regulaziun vertenta dal dretg dals medis da consegnar medicaments na vuless la cumissiun betg tematisar. Tenor la missiva duai l'art. 36 vertent da la lescha davart ils fatgs da sanadad vegnir transferì – senza midar il cuntegn – en la lescha introductiva tar la lescha federala davart ils products terapeutics. En la consultaziun n'è correspundentamain betg vegnida fatga ina discussiun fundada davart in'eventuala schluccada da la consegna da medicaments tras il medi sez. Perquai pari a la cumissiun che las pre¬missas per ina discussiun seriusa en il cussegl grond na sajan betg dadas.

La CSF propona al cussegl grond d'acceptar la revisiun totala da la lescha da sanadad.

Infurmaziuns:
pledadra da la cumissiun Erika Cahenzli-Philipp, tel 079 775 69 39


Revisiun parziala da la lescha dal persunal
En in'ulteriura sesida ha la CSF predeliberà la missiva da la regenza tar la revisiun parziala da la lescha davart la relaziun da lavur da las collavuraturas e dals collavuraturs dal chantun Grischun (lescha dal persunal). La sesida è vegnida presidiada da la presidenta da la cumissiun Christina Bucher-Brini ed è vegnida accumpagnada da la cussegliera guvernativa Barbara Janom Steiner.

En la cumissiun èsi stà in fatg incontestà d'entrar en la revisiun parziala da la lescha dal persunal ch'il cussegl grond ha lantschà sez cun acceptar l'incumbensa Nay en la sessiun da favrer 2015. Il punct central dal project, l'aboliziun da l'augment automatic da la summa dals salaris per in pertschient, vegn acceptà d'ina gronda maioritad da la cumissiun. Ina minoritad da la cumissiun pretenda percunter da laschar il mecanissem tenor il dretg vertent. Plinavant propona la medema minoritad da fixar en la lescha in congedi da paternitad d'almain 10 dis. En il sboz da la lescha è il congedi da paternitad bain previs, ma sia durada duai vegnir fixada da la regenza en l'ordinaziun. Previs èn 5 dis.

La CSF propona al cussegl grond d'acceptar la revisiun parziala da la lescha dal persunal.

Infurmaziuns:
presidenta da la cumissiun Christina Bucher-Brini, tel 078 818 77 72


Revisiun parziala da la lescha chantunala da sustegn
Sco terza fatschenta ha la CSF predeliberà la missiva da la regenza tar la revisiun parziala da la lescha chantunala da sustegn. A la sesida ch'è medemamain vegnida presidiada da la presidenta da la cumissiun Christina Bucher-Brini, è sa participà da vart da la regenza il cusseglier guvernativ Jon Domenic Parolini.

En il project che va enavos sin ina incumbensa dal deputà Caviezel (Tavau Clavadel), ch'il cussegl grond ha acceptà, è la cumissiun entrada unanimamain. La revisiun parziala da la lescha chantunala da sustegn cumpiglia in'unica disposiziun. Questa disposiziun garantescha ina repartiziun solidarica sin tut las vischnancas dals custs nets che resultan pervia da l'assistenza e dal sustegn da fugitivs minorens betg accumpagnads. Per fugitiv minoren betg accumpagnà paja la confederaziun ina pauschala globala che na cuvra insumma betg ils custs. La regulaziun proponida evitescha per l'ina grevezzas unilateralas da vischnancas cun blers fugitivs e tegna quint per l'autra dal fatg che l'assistenza ed il sustegn da fugitivs pertutga la cumpetenza da las vischnancas. La gronda maioritad da la cumissiun approvescha la proposta da la regenza. Ina minoritad da la cumissiun percunter propona da midar la disposiziun en quel senn, ch'ils custs betg cuvrids na vegnian betg repartids solidaricamain sin las vischnancas, mabain – malgrà la cumpetenza da las vischnancas – duajan vegnir surpigliadas da nov dal chantun.

En la medema sesida ha la cumissiun er tractà la petiziun dal 2. parlament da mattas concernent "La collocaziun da requirents d'asil minorens betg accumpagnads en famiglias ospitantas". Ella vegn a proponer al cussegl grond da prender enconuschientscha da la petiziun e da trametter quella vinavant a la regenza. Pervia da la cumplexitad da la tematica, pervia dals differents acturs involvids e pervia dal caracter operativ dals giavischs da las petentas pari a la CSF che la regenza saja l'adressata cumpetenta da la petiziun.

Infurmaziuns:
presidenta da la cumissiun Christina Bucher-Brini, tel 078 818 77 72


Gremi: cumissiun per sanadad e fatgs socials
Funtauna: rg cumissiun per sanadad e fatgs socials