La regenza ha deliberà il sboz per ina revisiun parziala da la lescha davart la protecziun cunter incendis per mauns dal cussegl grond. La protecziun cunter incendis vegn adattada als basegns da l'applicaziun da la lescha e da la giurisdicziun.

Cun la revisiun parziala da la lescha davart la protecziun cunter incendis vegn stgaffida ina basa giuridica per conceder contribuziuns da gestiun da l'assicuranza d'edifizis dal Grischun (GVG) a las vischnancas, e quai per ch'ellas possian garantir la qualitad ed il mantegniment dals indrizs dal provediment cun aua da stizzar fieu. Ils indrizs dal provediment cun aua da stizzar fieu èn oz installads praticamain en tut las vischnancas ed èn en in bun stadi. I vala ussa da procurar ch'ils indrizs dal provediment cun aua da stizzar fieu vegnian mantegnids uschia, ch'els correspundan permanentamain a las pretensiuns qualitativas da las directivas specificas respectivas. Uschia ston las disposiziuns legalas davart l'admissiun da las maistras e dals maisters spazzachamin vegnir adattadas a la giurisdicziun da la dretgira administrativa.

Plinavant vegni profità da l'occasiun per adattar las disposiziuns respectivas a la legislaziun federala davart las materias explosivas ch'è vegnida revedida. Ultra da quai vegni permess a l'assicuranza d'edifizis da scumandar ubain d'interrumper in'occurrenza cun in potenzial da periclitaziun spezial, sch'ina mancanza areguard la tecnica da protecziun cunter incendis vi d'in edifizi u vi d'in stabiliment na vegn betg eliminada avant il cumenzament da l'occurrenza respectivamain immediatamain suenter l'avertiment.

Il project da la revisiun parziala da la lescha davart la protecziun cunter incendis ha chattà dapertut in'acceptanza positiva en la consultaziun. Las propostas proponidas da la lescha davart la protecziun cunter incendis èn stadas en general incontestadas.


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch  


Gremi: regenza
Funtauna: rg chanzlia chantunala