Sut il motto "Co vai cun tai?" han lieu dals 9 da settember fin ils 11 d'october 2016 – en collavuraziun cun radund 40 partenaris – ils 2. dis d'acziun grischuns per la sanadad psichica. En l'entir chantun Grischun vegnan organisadas 53 occurrenzas che servan a la prevenziun, a l'infurmaziun ed al scleriment.
La gronda part dals umans san, co ch'els pon tegnair fit lur corp. Las strategias per promover la sanadad psichica n'èn percunter strusch enconuschentas, schebain che la sanadad psichica ed il bainesser psichic èn la clav per ina vita plain satisfacziun. Malsognas psichicas, precis sco malsognas corporalas, tutgan però tar la vita e pon tutgar mintgina e mintgin. Mintga segunda persuna en Svizra patescha ina giada en il decurs da sia vita d'ina malsogna psichica che po vegnir tractada. Perquai fa quasi mintga persuna experientschas directas cun quellas en la famiglia, en ils conturns da lavur u en ils conturns da temp liber.
Ensemen cun radund 40 partenaris va l'uffizi da sanadad dal Grischun cun il tema "Sanadad psichica" en la publicitad. Ils dis d'acziun "Co vai cun tai?" cun 53 occurrenzas envidan la populaziun a vegnir a savair, co ch'ins mantegna la sanadad psichica e co ch'ins fa frunt a squitschs ed a crisas. D'ina cumedia cun Fabian Unteregger sur films e referats fin a curs e cafés narrativs, ils dis d'acziun "Co vai cun tai?" porschan in program varià cun temas inspirants.
Ils dis d'acziun vegnan averts ils 9 da settember, a chaschun dal di mundial da la prevenziun da suicidi, cun ina prelecziun e silsuenter cun ina discussiun al podium davart il tema "Enconuschientschas per la vita – experientschas persunalas davart il suicidi". Suicidis chaschunan trais giadas dapli mortoris en Svizra che accidents da traffic – passa 1000 per onn. Saskia Jungnikl, l'autura e schurnalista austriaca prelegia ils 9 da settember da ses cudesch "Papa hat sich erschossen". En la discussiun al podium che suonda la prelecziun dattan ulteriurs giasts invistas da lur experientschas persunalas cun il suicidi.
Infurmaziuns:
- Denise Rudin, uffizi da sanadad, manadra da partiziun, tel. 081 257 64 08, e-mail
Denise.Rudin@san.gr.ch
Gremi: uffizi da sanadad dal Grischun
Funtauna: rg uffizi da sanadad dal Grischun