L'archiv dal stadi dal Grischun e la fundaziun "Gott hilft" sa legran da pudair preschentar la publicaziun la pli nova en la retscha "funtaunas e perscrutaziuns davart l'istorgia dal Grischun". Questa giada arriva la perscrutaziun fin al temp preschent.
"Niemandskinder" emprova da respunder la dumonda, co che uffants vegnivan e vegnan educads en chasas d'uffants. Tge differenziescha l'educaziun tras persunas estras da quella tras confamigliars? Co è l'educaziun tras persunas estras sa sviluppada? Qua vegn elavurà in toc da l'istorgia sociala e culturala ch'era fin ussa en il stgir. Il cudesch è vegnì scrit per incumbensa da la fundaziun "Gott hilft" che fa frunt uschia a sia istorgia. Per in tschert temp ha la fundaziun manà fin 12 chasas d'uffants en il Grischun ed en 4 ulteriurs chantuns.
Fotografia:
Uffants vestgids da festa da l'emprima chasa d'uffants a Favugn ch'è vegnida fundada l'onn 1916 da la fundaziun "Gott hilft"
En las chasas d'uffants evangelicas da la fundaziun era il mintgadi al cumenzament dir, tant per ils uffants sco er per ils creschids. Pir l'onn 1965 han las educaturas ed ils educaturs survegnì ina scolaziun pedagogica. Quai è stà in grond levgiament per els. Ma l'usit da dar chastis corporals e da far umiliaziuns resta tuttina anc ditg. Cun la percepziun dals uffants plitost sco equivalents als creschids è l'educaziun tras persunas estras sa midada fundamentalmain. Quest svilup è stà il pass il pli grond vers ina educaziun professiunala.
Vernissascha:
venderdi, ils 26 d'avust 2016, a las 17.30, en la sala Loë, Loëstrasse 26, Cuira.
Infurmaziuns:
Brigitte Aregger, archiv dal stadi dal Grischun / uffizi da cultura, tel. 081 257 28 20, e-mail
Brigitte.Aregger@sag.gr.ch, rait
www.staatsarchiv.gr.ch
Gremi: uffizi da cultura / archiv dal stadi
Funtauna: rg uffizi da cultura / archiv dal stadi