La regenza ha fixà ils pajaments da gulivaziun da l'onn 2017 per las 112 vischnancas grischunas. 70 vischnancas survegnan daners da la gulivaziun da las resursas, tut en tut 27,6 milliuns francs. Questas contribuziuns vegnan messas a disposiziun dal chantun e da 42 vischnancas finanzialmain fermas. Da la gulivaziun da las grevezzas geografic-topograficas e da scola survegnan 56 vischnancas totalmain 24 milliuns francs dal chantun.

La gulivaziun da finanzas per las vischnancas grischunas ha la finamira da rinforzar l'independenza finanziala da las vischnancas, da reducir las differenzas finanzialas tranter las vischnancas, da garantir la dotaziun finanziala da basa, da mitigiar grevezzas finanzialas sproporziunadas e d'evitar cas da direzza. Las differenzas tranter las vischnancas èn enorm grondas en quai che reguarda la vart da las entradas e la vart da las grevezzas.

La regenza ha fixà la fermezza da las resursas da l'onn 2017 per las 112 vischnancas grischunas. Decisivs per quai èn ils onns fiscals 2013 e 2014. Sin questa basa ha ella fixà ils pajaments per la gulivaziun da las resursas (GRes).

Il potenzial da resursas decisiv per l'onn da gulivaziun 2017 è creschì – sur tut las vischnancas – per 34,1 milliuns francs sin 747,5 milliuns francs (+4,8 pertschient). Las taglias da las persunas natiralas (taglias sin las entradas e sin la facultad sco er taglias a la funtauna) èn s'augmentadas per totalmain 21 milliuns francs, ils tschains d'aua per 4 milliuns francs. Uschia sa fa valair il maximum dal tschains d'aua ch'è vegnì auzà dapi l'onn 2014 tras il dretg federal.

La media da las entradas decisivas per persuna importa 3631 francs ed è creschida per passa 5 pertschient envers l'onn precedent (onn precedent: 3451 francs). La differenza tanscha da la vischnanca actualmain la pli debla, Furna, che ha atgnas entradas da 35 pertschient da la media totala dal Grischun, fin a Farera cun atgnas entradas da passa 600 pertschient.

42 vischnancas èn finanzialmain fermas, q.v.d. ellas han ina fermezza da las resursas da passa 100 pertschient. Ellas han entradas surproporziunalmain autas per persuna. Da las entradas che surpassan la media da tut las vischnancas cedan ellas 16 pertschient (onn precedent: 17,5 pertschient). Las tschintg vischnancas che pajan il pli bler per persuna èn Farera, San Murezzan, Schlarigna, Runtgaglia e Sufers.

Contribuziuns da gulivaziun survegnan las 70 vischnancas finanzialmain deblas, q.v.d. quellas vischnancas che han ina fermezza da las resursas sut 100 pertschient. Grazia a questas contribuziuns da gulivaziun cuntanschan ellas ina fermezza da las resursas d'almain 68 pertschient da la media dal Grischun (onn precedent: 70 pertschient). Las tschintg vischnancas che survegnan il pli bler per persuna èn Furna, Flearda, Maton, Nufenen e Lon. La GRes procura per in'assimilaziun essenziala da la dotaziun dals meds finanzials tranter las vischnancas.

Set vischnancas cun paucas resursas survegnan l'onn 2017 dal chantun supplementarmain ina gulivaziun limitada da tut en tut stgars 1,6 milliuns francs. Questa gulivaziun facilitescha a questas vischnancas da midar al sistem nov.

Da la gulivaziun da las grevezzas geografic-topograficas e da scola (GGG) profiteschan l'onn 2017 tut en tut 56 vischnancas. Il chantun metta a disposiziun 24 milliuns francs per quest intent. Decisivas per la repartiziun èn las lunghezzas da las vias, la surfatscha, la structura d'abitadi sco er la quota procentuala da scolaras e scolars da la scola populara en proporziun cun il dumber total d'abitantas e d'abitants. Resguardada vegn en quest connex la fermezza da las resursas da las vischnancas. Stgars 5,1 milliuns francs vegnan pajads a vischnancas che han chargias spezialmain grondas pervia da la scola populara. Las tschintg vischnancas che survegnan il pli bler per persuna èn Furna, Nufenen, Valragn, Val Stussavgia e Maton.

La gulivaziun da las grevezzas socialas (GGS) sco er la gulivaziun individuala d'inegualitads per grevezzas extraordinarias (GIG) na pon betg vegnir fixadas ordavant. Qua vegnan las vischnancas pertutgadas ad inoltrar al chantun lur dumondas da contribuziun correspundentas. Il chantun fa quint cun stgars 7 milliuns francs per la GGS e cun 1 fin 2 milliuns francs per la GIG. Las dumondas per la GGS da l'onn 2017 vegnan las vischnancas ad inoltrar pir la primavaira 2018. Dumondas per la GIG da l'onn 2017 pon vegnir inoltradas da tut temp a partir da l'onn proxim.

Ils parameters da la gulivaziun da las resursas da l'onn 2017 sco er il volumen total da l'onn 2017 per la gulivaziun da las grevezzas geografic-topograficas e da scola e per la gulivaziun individuala d'inegualitads per grevezzas extraordinarias vegn il cussegl grond a fixar definitivamain cun il preventiv 2017.

Midadas envers la calculaziun da l'onn 2016
Per las singulas vischnancas resultan per part midadas pli grondas envers las cifras da l'onn precedent. Per questas vischnancas èn sa midadas essenzialmain las basas da calculaziun decisivas. Il sistem tegna quint da quest fatg. La gulivaziun da finanzas resguarda questa dinamica.


Infurmaziuns:
cussegliera guvernativa Barbara Janom Steiner, scheffa dal departament da finanzas e vischnancas, cuntanschibla a partir da las 15.00, tel. 081 257 32 01, e-Mail Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun