Dapi l'emprima siglientada per il tunnel da Silvaplauna avant in onn e mez arriva ussa l'exchavaziun per il tunnel da 750 meters lunghezza a sia fasa finala. Cun la perfuraziun dad oz vegn cuntanschì in term impurtant dal sviament da Silvaplauna.

Il project "sviament da Silvaplauna" è sin buna via per l'avertura probabla l'atun 2018. Da l'avanzament che descenda e da l'emprima exchavaziun Pignia èn resultads dapi la primavaira 2015 circa 95 000 meters cubic material. A chaschun da la perfuraziun dad oz vegnan ussa exchavads ils ultims meters grip che mancan anc per il tunnel extraordinari cun ina pendenza dad 8,5 pertschient. Uschia resulta per l'emprima giada in passadi tranter las duas varts dal tunnel.

Cun perfurar il tunnel han ins dumagnà las ristgas geologicas en il granit dal Güglia, uschia che suenter las lavurs d'exchavaziun poi vegnir cumenzà cun las construcziuns internas dal tunnel. Sco gia l'emprima siglientada e la festa annuala da la Sontga Barbara, vegn er la perfuraziun festivada commensuradamain dals construiders dal tunnel.

Fin a l'avertura da sviament da Silvaplauna che cumpiglia circa 1470 meters e che importa custs totals da ca. 70 milliuns francs èsi anc necessari da far vastas lavurs. Particularmain èsi da terminar las construcziuns internas e l'equipament da gestiun e da segirezza dal tunnel, la galaria da segirezza ed il tunnel construì sut tschiel avert sco er las centralas dal tunnel ed ils trassés che mancan anc.

Ulteriuras infurmaziuns davart il sviament da Silvaplauna chattais Vus en il fegl d'infurmaziun da l'uffizi da construcziun bassa pertutgant il cumenzament da l'exchavaziun.




Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-Mail Mario.Cavigelli@bvfd.gr.ch
- Roger Stäubli, schef da la construcziun da vias, uffizi da construcziun bassa dal Grischun, tel. 081 257 38 42, e-Mail Roger.Staeubli@tba.gr.ch


Gremi: departament da construcziun, traffic e selvicultura dal Grischun
Funtauna: rg departament da construcziun, traffic e selvicultura dal Grischun