Las directuras ed ils directurs da giustia e polizia dals chantuns da la Svizra orientala (CDCGP-ost) sustegnan il project per la lescha davart il servetsch d'infurmaziun che vegn en votaziun ils 25 da settember 2016. Cun quest project vegnan adattadas l'activitad, l'instrucziun e la controlla dal servetsch d'infurmaziun da la confederaziun (SIC) al progress tecnic e resguardadas meglier las ristgas e las smanatschas ch'èn sa midadas.

La segirezza è ina premissa fundamentala per la libertad. Tras l'extremissem violent ed il terrorissem vegn periclitada er la segirezza en Svizra. Cun il project per la lescha davart il servetsch d'infurmaziun ch'il parlament federal ha deliberà ils 25 da settember 2015 e cunter il qual è vegnì fatg in referendum, duai la segirezza vegnir augmentada vinavant. La lescha davart il servetsch d'infurmaziun permetta da proteger la Svizra meglier en spezial cunter l'extremissem violent e cunter il terrorissem, cunter la spiunascha economica e cunter attatgas virtualas.

La conferenza da las directuras e dals directurs chantunals da giustia e polizia da la Svizra orientala, che cumpiglia ils chantuns Appenzell Dador, Appenzell Dadens, Glaruna, Grischun, Schaffusa, Son Gagl, Turgovia e Turitg, sustegna unanimamain il project per la lescha davart il servetsch d'infurmaziun. Cun quella survegn il servetsch d'infurmaziun da la confederaziun ina basa giuridica moderna ed ina incarica clera. La lescha davart il servetsch d'infurmaziun dat al servetsch d'infurmaziun da la confederaziun dapli pussaivladads, rinforza però er la controlla independenta da sias activitads. Las mesiras per procurar infurmaziuns dastgan vegnir applitgadas mo en cas d'ina smanatscha concreta e premettan – uschenavant ch'ellas ston vegnir approvadas – ina permissiun da trais instanzas. La lescha davart il servetsch d'infurmaziun serva directamain a la segirezza da la Svizra.


Infurmaziuns:
- president da la regenza Christian Rathgeb, schef dal departament da giustia, segirezza e sanadad, president CDCGP-ost, tel. 081 257 25 01, e-mail: Christian.Rathgeb@djsg.gr.ch  


Gremi: conferenza da las directuras e dals directurs chantunals da giustia e polizia da la Svizra orientala
Funtauna: rg conferenza da las directuras e dals directurs chantunals da giustia e polizia da la Svizra orientala