L'uffizi per la segirezza da victualias e per la sanadad d'animals ha relaschà in scumond per persunas privatas da pavlar selvaschina d'ungla (tschiervs, chavriels, chamutschs, capricorns) en la regiun da cunfin cun l'Austria. Quest scumond vala a partir dal 1. da settember 2016 e serva sco mesira preventiva per evitar che la tuberculosa vegnia importada tras la selvaschina dal Vorarlberg en ils effectivs da selvaschina e da muvel da niz indigens. Fin ussa n'èn anc vegnids constatads nagins cas da tuberculosa tar la selvaschina en il chantun Grischun.

La malsogna e la situaziun actuala
La tuberculosa è ina malsogna infectusa bacteriala cronica dals umans e dals animals. Tar ils arments poi durar mais fin onns davent da l'infecziun fin a la cumparsa d'emprims sintoms da la malsogna. En ina fasa tardiva da la malsogna sa mussa la tuberculosa tar ils arments sco malsogna cronica spussanta tras nufs limfatics engrondids, tras stauschs da fevra, tras ina reducziun da la prestaziun da latg e tras quai ch'ils animals smagreschan.

Durant ils onns 50 è vegnida cumbattida la tuberculosa tras programs d'extirpaziun statals. L'onn 1960 ha la Svizra pudì declerar sco in dals emprims pajais da l'Europa che ses effectivs da muvel da niz sajan libers da la tuberculosa.

La malsogna daventa ussa puspè actuala. La populaziun da tschiervs en il Vorarlberg ed en il Tirol è per part infectada fermamain cun la tuberculosa. Pervia dal cumportament da migraziun dals tschiervs tranter il Vorarlberg ed il Signuradi, il Partenz e l'Engiadina bassa sur ils pass dal Reticon exista il privel che la tuberculosa vegnia transmessa sin la selvaschina indigena e vinavant sin il muvel da niz. Quai sto vegnir evità.

Per constatar a temp, sche la tuberculosa vegn eventualmain importada en ils effectivs da tschiervs indigens, vegn realisà dapi l'onn 2013 in project da constataziun tempriva. Dapi l'onn 2014 exista in program da surveglianza da la confederaziun. En in territori da ristga definì vegnan prendidas durant e suenter la chatscha emprovas da controlla e durant l'entir onn – sin basa da la ristga – emprovas da chatschas da tgira e da selvaschina disgraziada. Fin oz n'han ins betg anc pudì constatar la tuberculosa tar quests animals.

Evitar la tuberculosa cun agid da mesiras preventivas
Per ch'il Grischun restia liber da la tuberculosa, stoi vegnir evità che la malsogna sa derasia sin ils effectivs da tschiervs e vinavant sin ils effectivs d'animals da niz. Quai vegn fatg cun agir a temp e cun prender mesiras preventivas duraivlas.
Entaifer la populaziun da selvaschina sa derasa la malsogna cunzunt là, nua ch'ils animals sa trategnan en massas sin in territori fitg pitschen. Ina derasaziun da scherms da tuberculosa d'in animal selvadi a l'auter sco er dals animals selvadis als arments è pussaivla en tuttas duas direcziuns, e quai tras il contact direct tranter ils animals u tras in contact indirect (p.ex. sur pavel u sur aua che cuntegna spida).

Per evitar talas concentraziuns d'animals e tals contacts è vegnì relaschà il scumond da pavlar activamain e passivamain selvaschina d'ungla en il territori da ristga. Igl è scumandà da pavlar activamain e sapientivamain la selvaschina (endrizzar indrizs da pavlar), ma er da pavlar passivamain e nunsapientivamain quests animals. Q.v.d. fain, rests da pavel, ballas da silo, material da cumpost e.u.v. èn da depositar uschia, che la selvaschina na po betg vitiers. D'ina vart na duai uschia la selvaschina betg pudair tiers pavel che vegn er maglià d'animals da niz, e da l'autra vart na duai la selvaschina er betg vegnir attratga cun pavel en la vischinanza dals animals da niz.
Quest scumond è ina mesira cunvegnenta e proporziunala per reducir drasticamain il privel che la malsogna sa derasia d'in tschierv a l'auter sco er tranter tschiervs ed animals da niz.

Territoris pertutgads e durada dal scumond
Pertutgads èn ils territoris da las vischnancas da Fläsch, Maiavilla, Jenins, Malans, Landquart, Seewis, Grüsch, Schiers, Luzein, Furna, Jenaz, Fideris, Küblis, Conters, Claustra-Serneus, Zernez, Scuol, Valsot e Samignun. Il scumond da pavlar vala l'entir onn. El cumenza il 1. da settember 2016 e dura per entant fin la fin d'avust 2018.

Exequì vegn il scumond tras l'uffizi per la segirezza da victualias e per la sanadad d'animals (USVA), tras l'uffizi da chatscha e pestga (UCP), tras las vischnancas e tras ils organs da la polizia.


Infurmaziuns:
Rolf Hanimann, veterinari chantunal, manader da l'uffizi per la segirezza da victualias e per la sanadad d'animals, Tel. 081 257 24 11 E-mail: Rolf.Hanimann@alt.gr.ch


Gremi: uffizi per la segirezza da victualias e per la sanadad d'animals
Funtauna: rg uffizi per la segirezza da victualias e per la sanadad d'animals