Tamara Gianera sa numna la nova manadra dal post da stab per l'egualitad da las schanzas. A partir dal december è ella responsabla per manar il post da stab en il Grischun.
Il departament d'educaziun, cultura e protecziun da l'ambient ha elegì Tamara Gianera sco nova manadra dal post da stab per l'egualitad da las schanzas. Tamara Gianera ha 34 onns e vegn a manar il post da stab a partir dal 1. da december 2016. L'istoricra dat actualmain curs per tudestg sco lingua estra a Cuira. Avant ha ella lavurà en l'archiv grischun per la cultura da las dunnas. Ella daventa successura da Silvia Hofmann Auf der Maur.
Sco manadra dal post da stab per l'egualitad da las schanzas surpiglia Tamara Gianera la direcziun dal center da cumpetenza impurtant dal chantun Grischun. Il post da stab per l'egualitad da las schanzas è cumpetent per promover, per realisar e per garantir l'egualitad da dunna ed um e l'egualitad da las schanzas en tut ils secturs da la vita. La manadra lavura ultra da quai en moda interdisciplinara e tgira ina stretga collavuraziun tematica cun differentas organisaziuns e persunas singulas. Quai permetta al post da stab ina lavur effizienta e professiunala a favur da l'egualitad da las schanzas. Tamara Gianera surpiglia la direcziun dal post da stab cun in pensum parzial da 60 pertschient.
Fotografia agiuntada:
Tamara Gianera, la nova manadra dal post da stab per l'egualitad da las schanzas.
Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail
Martin.Jaeger@ekud.gr.ch
Gremi: departament d'educaziun, cultura e protecziun da l'ambient
Funtauna: departament d'educaziun, cultura e protecziun da l'ambient