Sin invit da la regenza ha l'ambassadur luxemburgais, Marc Thill, visità oz il chantun Grischun.
L'ambassadur dal Luxemburg Marc Thill è vegnì beneventà oz en la chasa grischa a Cuira dal president da la regenza dr. Christian Rathgeb e dal chancelier dr. Claudio Riesen. El è vegnì accumpagnà da Jan Dolezel, attasché per fatschentas politicas ed economicas. Suenter il barat dals salids uffizials è in gentar cuminaivel stà sin il program.
La regenza grischuna tgira annualmain contacts cun represchentantas e represchentants da stadis esters en Svizra. Quests discurs èn elements impurtants da las relaziuns dal chantun cun l'exteriur. Cun ils stadis vischins e cun pajais che han relaziuns spezialas cun la Svizra e cun il Grischun vegnan savens discutadas dumondas specificas actualas. Autras visitas servan en emprima lingia a barattar experientschas sin il champ cultural, economic e politic.
Fotografia agiuntada:
![-](/DE/Medien/Mitteilungen/MMStaka/2016/PublishingImages/Botschafter_Luxemburg__w_650__h_0.jpg)
L'ambassadur Marc Thill (segund da sanestra), accumpagnà da l'attasché per fatschentas politicas ed economicas Jan Dolezel, vegn beneventà en la chasa grischa dal president da la regenza dr. Christian Rathgeb (a sanestra) e dal chancelier dr. Claudio Riesen (a dretga).
Gremi: regenza
Funtauna: rg chanzlia chantunala dal Grischun