La regenza grischuna ha nominà Claudio Riedi sco nov emprim procuratur public. El vegn a surpigliar questa funcziun il 1. da zercladur 2017.

La regenza grischuna ha elegì l'advocat lic. iur. Claudio Riedi, da Cazas, sco nov emprim procuratur public. Claudio Riedi ha 49 onns ed ha lavurà durant blers onns sco inquisitur tar la procura publica dal Grischun, nua ch'el ha dapi l'onn 2011 la funcziun d'in procuratur public directiv. Dapi l'onn 2014 è el plinavant substitut da l'emprim procuratur public. El daventa successur da Renato Fontana che va en pensiun la fin da matg 2017 suenter 12 onns sco emprim procuratur public.

L'emprim procuratur public maina la procura publica dal chantun Grischun. Quella è independenta en la persecuziun penala ed ha circa 60 collavuraturas e collavuraturs. La procura publica fa inquisiziuns penalas cunter persunas creschidas e cunter giuvenils en cas da crims, da delicts e da surpassaments, ed ella sto exequir il dretg statal da chastiar. Administrativamain è ella suttamessa al departament da giustia, segirezza e sanadad.

Fotografia agiuntada:

Claudio Riedi


Infurmaziuns:
president da la regenza Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch


Gremi: regenza
Funtauna: rg chanzlia chantunala dal Grischun