Il schurnalist da radio Curdin Vincenz, oriund dal Grischun, retschaiva il premi da radio e televisiun da la Svizra orientala da quest onn. Il premi vegn surdà da la SSR Svizra orientala; ils chantuns da la Svizra orientala mettan a disposiziun il daner dal premi. Cun il premi duai vegnir undrada ina persunalitad che fa in schurnalissem pretensius, solid e multifar.

Curdin Vincenz, naschì l'onn 1973 e creschì si a Trimmis dador Cuira, ha studegià suenter la matura fil. I a l'universitad da Berna. Curt suenter la fin da ses studi ha el cumenzà tar Radio DRS – ch'è ussa enconuschentamain Radio SRF – nua ch'el lavura dapi bunamain 20 onns en las funcziuns las pli differentas. L'onn 1996 ha el cumenzà tar ils schurnals regiunals Svizra orientala e Grischun. L'onn 1998 ha el midà a Turitg en la redacziun da novitads. L'onn 2001 è el turnà tar il schurnal regiunal Grischun, nua ch'el è stà correspundent grischun fin l'onn 2006. Lura ha el lavurà sco moderatur tar il magazin da novitads "Rendez-vous". La fin da l'onn 2011 è el daventà correspundent da Turitg da Radio SRF. Ses ultim pass professiunal ha el fatg pir dacurt: Dapi la fin d'october 2016 è el commember da la redacziun da la chasa federala da Radio SRF.

La surdada dal premi è publica ed ha lieu gievgia, ils 15 da december 2016, cumenzament a las 19.00, en l'edifizi da Radiotelevisiun Svizra Rumantscha RTR (Via da Masans 2) a Cuira.

Fotografia agiuntada:

Curdin Vincenz, Funtauna: SRF


Infurmaziuns:
Hildegard Jutz, manadra da la cumissiun da program e commembra da la suprastanza da la SSR Svizra orientala, tel. 058 229 32 64


Gremi: cumissiun da program da la SSR Svizra orientala
Funtauna: rg cumissiun da program da la SSR Svizra orientala