Tenor l'incumbensa dal cussegl grond vegn la lescha per promover la cultura revedida totalmain. Tar questa revisiun n'è betg mo vegnida resguardada la dumonda da posiziunar da nov la promoziun chantunala da la cultura, mabain er las ulteriuras incumbensas parlamentaras e las structuras novas ch'èn resultadas da la refurma dal territori.

Cumpareglià cun auters chantuns svizzers ha la cultura dal Grischun ina posiziun speziala en differents reguards. Il svilup individual ed independent da las differentas valladas fin lunsch en il 20avel tschientaner ha generà ina diversitad culturala che sa manifestescha il pli fitg en il sectur da las linguas.
La promoziun actuala da la cultura dal chantun Grischun sa basa sin la lescha per promover la cultura dals 28 da settember 1997 e sin l'ordinaziun tar la lescha per promover la cultura dals 12 da schaner 1998. La lescha per promover la cultura sco er l'ordinaziun che sa basa sin tala èn sa cumprovadas fin oz en blers secturs sco basa per la promoziun chantunala da la cultura. Perquai èn vegnidas surpigliadas intginas regulaziuns en il nov sboz. Tenor la proposta da la regenza duai er la revisiun totala da la lescha per promover la cultura esser formulada en furma concisa.

La revisiun totala da la lescha per promover la cultura è vegnida iniziada da l'incumbensa dal deputà Bruno Claus e consutsegnaders che ha pretendì da la regenza da suttametter al cussegl grond ina revisiun totala da la lescha per promover la cultura. En connex cun la revisiun totala da la lescha davart il svilup economic è vegnida fatga ina cunfinaziun tranter il svilup economic e la promoziun da la cultura. Tscherts puncts centrals pussaivels da la promoziun da la cultura (lavur culturala professiunala e cultura laica), ils puncts da contact cun la promoziun da l'economia sco er las cumpetenzas e l'elecziun da la cumissiun chantunala per promover la cultura han stuì vegnir sclerids. Da nov èsi previs d'integrar explicitamain il sustegn da la lavur culturala professiunala en las finamiras da la lescha. Plinavant prevesa il sboz d'obligar las regiuns da metter a disposiziun ina purschida cumplessiva da scolas da chant e da musica.

Tar l'elavuraziun dal sboz ch'è ussa qua avant maun èn er vegnids resguardads ils resultats da l'incumbensa Caduff concernent ina pausa tar la revisiun totala da la lescha per il svilup economic e l'incumbensa Montalta concernent l'elavuraziun d'in concept chantunal per promover e per finanziar ils museums regiunals ed ils centers da cultura regiunals. Blers giavischs dals 160 participants a la consultaziun han medemamain pudì vegnir integrads. Uschia duai per exempel la regenza vegnir obligada da relaschar in concept cumplessiv davart la promoziun da la cultura en il chantun Grischun.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- Barbara Gabrielli, manadra da l'uffizi da cultura, tel. 081 257 48 01, e-mail Barbara.Gabrielli@afk.gr.ch


Gremi: regenza
Funtauna: rg chanzlia chantunala dal Grischun