La cumissiun dal cussegl grond per economia e taxas ha tractà en sia ultima sesida la missiva da la regenza tar la candidatura per ils gieus olimpics e paralimpics d'enviern 2026 e propona al cussegl grond d'approvar il credit d'impegn correspundent.

Sut il presidi dal president da la cumissiun Peter Engler ed en preschientscha dal cusseglier guvernativ Jon Domenic Parolini, schef dal departament d'economia publica e fatgs socials, ha la cumissiun dal cussegl grond per economia e taxas (CET) tractà la missiva da la regenza tar la candidatura per ils gieus olimpics e paralimpics d'enviern 2026 per mauns dal cussegl grond.

Procedura da dus pass
La dumonda centrala da la missiva al cussegl grond e – premess che quel dettia sia approvaziun en chaussa – a la populaziun dal Grischun (votaziun dal pievel dals 12 da favrer 2017) è la concessiun d'in credit d'impegn per cuvrir ils custs d'ina candidatura per ils gieus olimpics e paralimpics d'enviern 2026. In'eventuala decisiun davart la realisaziun dals gieus olimpics d'enviern vegniss prendida pir en ina segunda votaziun (probablamain l'atun 2018).

Credit d'impegn brut da 25 milliuns francs per la candidatura
Il credit d'impegn dumandà è previs per la fasa da candidatura che dura 3 onns fin a la surdada dals gieus olimpics d'enviern 2026, il fanadur 2019. El importa brutto 25 milliuns francs, dals quals 1 milliun francs è previs per agens scleriments da vart da la regenza. Ils ulteriurs 24 milliuns francs duain surpigliar per mintgamai in terz la confederaziun, Swiss olympic e la regiun che organisescha ils gieus olimpics. Il chantun Grischun avess pia da surpigliar per la fasa da candidatura tut en tut maximalmain 9 milliuns francs. Sche la candidatura vegniss gia sistida en in stadi anteriur, vegniss il credit – tut tenor il stadi da las lavurs – duvrà mo per part.

Autra situaziun da partenza che avant 4 onns
Auter ch'en cas da la missiva per ils gieus olimpics d'enviern 2022 dal Grischun na sa basa la missiva qua avant maun anc betg sin in concept detaglià. Quel duai vegnir elavurà cun il credit d'impegn dumandà sin basa d'in concept general. Pervia da quai na pon bleras dumondas che concernan la realisaziun dals gieus olimpics d'enviern betg vegnir respundidas per il mument. Cuntrari a l'ultima votaziun davart ils gieus olimpics dal mars 2013 na sa tracti sco menziunà anc betg d'ina decisiun per realisar ils gieus olimpics d'enviern, mabain da deliberar in credit per la candidatura. Tar la segunda votaziun che pertutgass alura la realisaziun, fissan dentant tut las cifras e tut ils fatgs sin maisa. Ina minoritad da la cumissiun, vul dir ina persuna, vuless perquai returnar la missiva a la regenza per che quella la possia repassar. La consequenza da quai fiss ch'il pievel na pudess per il mument betg s'exprimer en chaussa e che pir la candidatura definitiva per ils gieus olimpics d'enviern vegniss en votaziun.

La cumissiun vuless profitar dals gieus olimpics e paralimpics d'enviern 2026 sco motor per sviluppar vinavant l'economia e la societad dal chantun en moda persistenta e vesa – pervia da l'extensiun da la libertad concepziunala ch'il IOC ha concludì (agenda 2020) – bunas schanzas per ina candidatura. Cun ina cuntravusch recumonda ella al cussegl grond d'approvar il project tenor la missiva. Er la minoritad na refusa betg il credit, ma vuless che la part dals custs dal Grischun vegniss repartida mintgamai per la mesadad sin il chantun e sin l'economia grischuna.

Il cussegl grond vegn a tractar questa fatschenta en la sessiun da december 2016.


Infurmaziuns:
Peter Engler, president da la cumissiun, tel. 076 553 13 59


Gremi: cumissiun per economia e taxas
Funtauna: rg cumissiun per economia e taxas