La regenza ha surdà l'incumbensa da sanar il convict da Cuira ed ha approvà ina dumonda da la Viafier retica da cumprar ulteriurs trens ad autotracziun.

Il convict da la scola chantunala grischuna duai vegnir sanà
La regenza ha surdà l'incumbensa per la renovaziun architectonica dal convict da la scola chantunala grischuna a Cuira al team enturn l'interpresa generala Implenia Svizra SA. Il convict è vegnì construì e terminà l'onn 1968 e serva a la collocaziun da circa 100 scolaras e scolars da la scola media grischuna. Il fitg nausch stadi dal convict ed il standard antiquà da la chasa pretendan ussa ina sanaziun cumplessiva.
La proposta projectada ch'è vegnida tschernida persvada, perquai ch'ella tracta cun respect ed en moda sensibla la substanza architectonica existenta. Las intervenziuns architectonicas èn vegnidas minimadas e sa restrenschan a quai ch'è necessari. Er ademplescha il concept fitg bain las pretensiuns da las utilisadras e dals utilisaders envers il manaschi. Per las lavurs da sanaziun ha la regenza approvà in credit da 27,3 milliuns francs. Cun resalva da l'approvaziun dal credit tras il cussegl grond en la sessiun da zercladur 2017 duai vegnir cumenzà cun las lavurs da sanaziun dal convict la stad 2018. Per la fasa da la sanaziun architectonica vegn construì in alloschi provisoric per circa 100 scolaras e scolars sin l'areal al vest da la chasa da scola Cleric. Il manaschi dal convict vegn pia dischlocà dal tuttafatg per tut il temp da sanaziun fin la fin d'october 2020.
Tut las contribuziuns ch'èn vegnidas inoltradas en il rom da la concurrenza vegnan exponidas dals 5 fin ils 9 da december 2016, mintgamai da las 17.00 fin a las 19.30, al plaunterren dal convict.

La Viafier retica cumpra ulteriurs trens ad autotracziun
Gia la stad ha la regenza approvà la quarta ed ultima etappa dal concept da flotta da la Viafier retica (VR) per la renovaziun dal material rullant. La quarta etappa prevesa l'acquist da 27 trens ad autotracziun accuplabels "Retica 30" che han mintgamai quatter parts. Ussa ha la regenza approvà in'ulteriura dumonda da la Viafier retica per augmentar questa quarta etappa per nov ulteriurs trens ad autotracziun. Ils custs d'acquisiziun importan 67,9 milliuns francs. 80 pertschient dals custs vegnan surpigliads da la confederaziun e 20 pertschient dal chantun. Correspundentamain resultan per il chantun custs d'amortisaziun annuals da circa 530 000 francs a partir dal mument ch'il nov material rullant vegn mess en funcziun.
L'acquisiziun da nov ulteriurs trens ad autotracziun è raschunaivla, cunquai che questas unitads pon vegnir surpigliadas a cundiziuns finanzialas fitg favuraivlas. Ultra da quai pon las expensas vegnir cumpensadas per part tras respargns e tras gudogns d'effizienza.

Il pais maximal sin la via da Tràn a Pasqual vegn augmentà
La regenza ha approvà l'augment dal pais maximal permess e da la ladezza maximala sin la via da Tràn a Pasqual. Pertutgà è in traject da circa 1,7kilometers tranter Tgiern e Vecs. Suenter che la via è vegnida renovada po il pais maximal permess vegnir auzà dad oz 9/18 tonnas sin 32 tonnas. Medemamain vegn la ladezza maximala augmentada dad actualmain 2,30 m a 2,55 m.


Gremi: regenza
Funtauna: rg chanzlia chantunala dal Grischun