La regenza ha ordinà sanaziuns da l'aua restanta en Surselva ed en il Grischun central ed ha approvà dus projects per la protecziun cunter crudada da crappa sco er la reparaziun da la punt da Surlej a Silvaplauna.

Sanaziuns da l'aua restanta en Surselva ed en il Grischun central
La regenza ha disponì la sanaziun da l'aua restanta prescritta da la lescha per las Ovras electricas dal Grischun central da la ewz, per l'Ovra electrica Rain anteriur SA (ORA) e per las Ovras electricas da Beiva (Impianti Elettrici Bivio, IEB).
L'ORA vegn obligada da dosar tenor stagiun l'aua a las tschiffadas dal Rain da Tuma, dal Rain anteriur sper Sedrun e dal Rain da Medel sco er da serrar ina tschiffada laterala en la Val Val. La ewz vegn obligada da dosar tenor stagiun l'aua a la tschiffada da la Gelgia sper il mir da serra da Murmarera e da l'Ava da Faller. Ultra da quai sto vegnir previsa en l'avegnir ina restituziun d'aua al sparta-auas Tgeps en direcziun dals Lais da Flix, ed i sto vegnir augmentada la valur ecologica sin l'Alp Flix. La finala ston er ils IEB restituir aua da dotaziun en la Gelgia a partir da la tschiffada a Platta.
Questas trais disposiziuns da sanaziun permettan da far in ulteriur pass impurtant en connex cun las sanaziuns da l'aua restanta en il Grischun. Per 169 da totalmain 224 tschiffadas d'aua è la sanaziun da l'aua restanta pia ussa reglada. Tut en tut cumpiglian las ovras electricas che ston vegnir sanadas, ma ch'èn gia regladas var 85 pertschient da la producziun totala en il chantun.

Dus projects per la protecziun cunter crudada da crappa
La regenza ha approvà dus projects per la protecziun cunter crudada da crappa en la vischnanca da Glion ed en Val Stussavgia. Il project "Peiden Bogn" da Glion duai proteger in traject da var 100 meters lunghezza da la via da Val S. Pieder. Mintga onn sa distatgan en quest lieu en media sis fin set gronds craps u blocs da la paraid da grip quasi verticala en vischinanza directa e crodan giu sin via. Per proteger quest traject vegnan ussa construidas segiraziuns da grippa d'ina surfatscha totala da var 5100 meters quadrat. La regenza garantescha ina contribuziun da maximalmain 1 200 000 francs als custs da project.
En Val Stussavgia duai il project "Protecziun da la via da la staziun da Versomi cunter crudada da crappa" procurar per dapli segirezza. Il 1. da favrer 2016 è sa distatgà in crappun tranter il vitg e la staziun da Versomi. Malgrà ch'i n'ha bain dà nagins donns da persunas u donns materials, duai ussa il territori vegnir segirà suffizientamain tras ina rait cunter crudada da crappa d'ina lunghezza da 21 meters. Il chantun conceda per quest intent circa 26 000 francs.

La punt da Surlej vegn reparada
Il project per la correcziun da la via da Surlej è vegnida approvada da la regenza cun intginas permissiuns spezialas e cun intginas cundiziuns.
La via da Surlej collia il vitg da Silvaplauna cun la fracziun Surlej ch'è situada da l'autra vart da la riva dal lai da Silvaplauna. La punt da Surlej cun ina lunghezza da circa 60 meters n'ademplescha betg pli las pretensiuns dad oz. La surstructura è en in stadi fitg nausch e sto vegnir reparada en moda cumplessiva. Ultra da quai n'è l'allontanament da l'aua da la via betg optimal. Pervia da quai è la punt savens schelada l'enviern. La correcziun planisada prevesa ina renovaziun da la surstructura da la punt e pia in'optimaziun da la via da Surlej. La segirezza structurala da la punt vegn meglierada confurm a las normas actualas. La pendenza longhitudinala da la punt duai vegnir augmentada, uschia che l'allontanament da l'aua da la via vegn optimà. Il trassé da la via da Surlej vegn midà levamain, damai ch'il vial vegn schlargià ed il passape vegn posiziunà unilateralmain.

Il pais maximal sin la via da Vaz vegn augmentà
La regenza ha approvà in augment dal pais maximal permess sin la via da Vaz en la vischnanca da Vaz. Pertutgà è in traject da circa 1,2 kilometers tranter la via dal Güglia e la serenera Canius. Cur che la via è renovada, po il pais maximal permess vegnir auzà dad actualmain 28 tonnas sin 40 tonnas. Sin quest traject vegn er abolì il scumond per camiuns cun chars annexs.

Per la fin da l'onn
Durant l'onn che va a fin ha la regenza grischuna salvà 42 sesidas. A chaschun da quellas ha ella prendì 1153 conclus (onn precedent: 1141).
Il presidi da la regenza va il 1. da schaner 2017 a Barbara Janom Steiner, scheffa dal departament da finanzas e vischnancas. Vicepresident daventa Mario Cavigelli, schef dal departament da construcziun, traffic e selvicultura.
La regenza giavischa a tut las conburgaisas ed a tut ils conburgais tut il bun per la fin da l'onn e buna sanadad per l'onn nov.


Gremi: regenza
Funtauna: rg chanzlia chantunala dal Grischun