La regenza ha refusà dus recurs da votaziun en connex cun la votaziun chantunala dal pievel davart la candidatura per ils gieus olimpics dals 12 da favrer 2017. Quests recurs han crititgà il cumportament da las vischnancas d'Arosa e da San Murezzan, che han empermess mintgamai 20 000 francs per la campagna da votaziun da las organisaziuns da tetg da l'economia grischuna. Ils recurrents pretendan che las donaziuns vegnian scumandadas u restituidas.

Tenor la pratica dal tribunal federal èn intervenziuns da vischnancas en in cumbat da votaziun chantunal da princip admissiblas mo, sche la vischnanca sco er sias votantas e ses votants han in interess direct e particular vi dal resultat da la votaziun e sche quest interess surpassa per bler l'interess da las ulteriuras vischnancas dal chantun. La vischnanca sto esser pertutgada en moda speziala dal project da votaziun. Tenor la regenza è ademplida questa premissa en il cas d'Arosa e da San Murezzan, perquai che tuttas duas vischnancas èn – tenor la candidatura per ils gieus olimpics – previsas sco lieus da concurrenza, e San Murezzan ultra da quai sco eventuala citad ospitanta.

Tuttas duas vischnancas n'han betg l'intenziun da manar atgnas campagnas, mabain vulan sustegnair finanzialmain la campagna da las organisaziuns da tetg da l'economia grischuna, pia sa participar indirectamain al cumbat da votaziun. Per ch'ina tala participaziun indirecta saja admissibla, ston las vischnancas ademplir tschertas premissas. Perquai èn ellas vegnidas incumbensadas da la regenza da garantir e da cumprovar ordavant – cun agid da mesiras e da cunvegnas adattadas cun ils organs da campagna privats – ch'ellas possian controllar en moda suffizienta, sch'ils meds publics mess a disposiziun vegnian utilisads confurm a l'intent e sche l'objectivitad e la discreziun vegnian resguardadas sco pretendì. Senza ina tala pussaivladad da prender influenza n'èn donaziuns da daners a comités privats percunter betg permessas tenor la giurisdicziun.

Plinavant na po il cumportament da las vischnancas er betg vegnir contestà sut l'aspect dal princip da la commensurabladad dals meds finanzials impundids, che sto vegnir resguardà, sche autoritads intervegnan en in cumbat da votaziun. Ina contribuziun da 20 000 francs na po betg vegnir designada sco sproporziunada en vista a la gronda impurtanza che gieus olimpics d'enviern han per las duas vischnancas turisticas. Perquai ha la regenza refusà ils recurs.

Tras quai ch'igl èn vegnidas fatgas prescripziuns a las vischnancas en las duas decisiuns e tras quai che la publicitad ed uschia er tut las ulteriuras vischnancas èn vegnidas infurmadas davart la situaziun giuridica en cas che vischnancas intervegnan en cumbats da votaziun surordinads, èsi vegnì fatg quai ch'è actualmain necessari per garantir la libertad da votar e d'eleger en la votaziun dals 12 da favrer 2017.


Infurmaziuns:
chancelier Claudio Riesen, chanzlia chantunala dal Grischun, tel. 081 257 22 21, e-mail Claudio.Riesen@staka.gr.ch


Gremi: regenza
Funtauna: Chanzlia chantunala dal Grischun