La cumissiun per furmaziun e cultura ha predeliberà la missiva da la regenza tar la revisiun totala da la lescha per promover la cultura per mauns dal cussegl grond. Ella è entrada unanimamain sin il project. Cun giuditgar il cuntegn dal project èn las opiniuns dentant stadas fitg differentas en la cumissiun.

La cumissiun dal cussegl grond per furmaziun e cultura ha predeliberà, sut il presidi da la presidenta Cornelia Märchy-Caduff, la missiva da la regenza tar la revisiun totala da la lescha per promover la cultura. A trais sesidas intensivas èn sa participads er il cusseglier guvernativ Martin Jäger, sia secretaria dal departament e la manadra da l'uffizi da cultura. La cumissiun è entrada unanimamain en il project ed ha deliberà il sboz da lescha – cun numerusas propostas da midada – per mauns dal cussegl grond.

Quai ch'è sa mussà avant che far la missiva en 160 posiziuns da consultaziun e cun correspundentamain blers giavischs per part fitg divergents, ha cuntinuà en la predeliberaziun da la cumissiun. Entradas èn numerusas propostas da maioritad e da minoritad davart il sboz da lescha. Dispitaivels èn stads cunzunt l'augment dals daners chantunals a favur da la cultura cun agid d'in credit general, las contribuziuns a las scolas da musica, la moda e maniera da tractar il concept per promover la cultura, la repartiziun da las incumbensas a las vischnancas u a las regiuns, la posiziun da la cumissiun da cultura sin il plaun da la lescha sco er la segirezza sociala per artistas ed artists. Per gronda part incontestadas èn restadas la meglieraziun da la situaziun finanziala dals museums e da las instituziuns culturalas regiunalas e pia la segirezza da planisaziun ch'ins vul cuntanscher cun quai. Plinavant èn sortidas dal ravugl da la cumissiun anc ulteriuras propostas che han l'intent da meglierar la posiziun da la cultura sco er da las artistas e dals artists en singuls secturs.

Il cussegl grond vegn a tractar la revisiun totala da la lescha per promover la cultura en la sessiun da favrer 2017.


Infurmaziuns:
presidenta da la cumissiun Cornelia Märchy-Caduff, tel. 079 440 44 57


Gremi: cumissiun per furmaziun e cultura
Funtauna: rg cumissiun per furmaziun e cultura