Las organisaziuns da protecziun civila dals chantuns Grischun, Son Gagl e Turitg sustegnan ils campiunadis mundials da skis alpin da la FIS 2017 a San Murezzan. Mo gia da la protecziun civila dal Grischun prestan 105 persunas 855 dis da servetsch a favur da questa occurrenza gronda.

Per l'entira durada dals campiunadis mundials da skis alpin da la FIS 2017 vegni fatg quint cun stgars 150 000 visitadras e visitaders. Las cumpagnias da protecziun civila dal Grischun han l'incumbensa da reglar il traffic, d'administrar las plazzas da parcar, da tgirar ils parcadis dals bus sco er da gidar ad installar ed a tegnair en funcziun l'infrastructura da concurrenza. Tut en tut 85 commembers e 20 polizists da la protecziun civila dal Grischun èn en acziun per sustegnair il comité d'organisaziun. Suenter l'occurrenza vegnan liquidadas fin ils 22 da favrer 2017 lavurs da rumida e da restabiliment.

Durant l'occurrenza adempleschan ils commembers dal cader lur incumbensas directivas sut cundiziuns d'in eveniment serius. Els treneschan la tecnica specifica e tiran conclusiuns per scolaziuns e per acziuns futuras. L'engaschament promova l'abilitad da collavurar sin plaun interchantunal en cas d'eveniments gronds.

Infurmaziuns:
Martin Bühler, manader da l'uffizi da militar e da protecziun civila, tel. 081 257 35 22, e-mail Martin.Buehler@amz.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad