La regenza grischuna ha nominà Marcus Hassler sco nov secretari dal departament d'economia publica e fatgs socials.

Marcus Hassler, M.A. HSG, da 33 onns, è creschì si a Donat ed ha studegià economia da manaschi e relaziuns internaziunalas a l'universitad da Son Gagl. Durant sias lavurs consecutivas sco cussegliader d'interpresas e da politica tar ina firma da cussegliaziun sco er sco collavuratur scientific e la finala sco manader da project tar economiesuisse è el s'acquistà l'experientscha professiunala necessaria en dumondas da l'economia publica e da la politica.

Marcus Hassler daventa il successur da Sandra Felix che surpiglia ina nova sfida tar l'uffizi federal da sport. El vegn ad entrar en funcziun il 1. da fanadur 2017. Il secretari dal departament sustegna il schef dal departament d'economia publica e fatgs socials en dumondas specificas e politicas sco er en la gestiun, en l'organisaziun ed en la controlla e garantescha in andament optimal da las fatschentas dal departament.

Infurmaziuns:
Cusseglier guvernativ Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: rg chanzlia chantunala dal Grischun