En sia funcziun sco presidenta da la regenza visita Barbara Janom Steiner tut las indesch regiuns. En il center stattan en quest connex ils contacts cun las presidentas communalas e cun ils presidents communals che fan part da las conferenzas da las presidentas e dals presidents da las regiuns. Ultra da quai servan las scuntradas al barat vicendaivel davart la collavuraziun tranter las vischnancas ed il chantun.

Dapi il 1. da schaner 2016 èn las indesch novas regiuns activas sin plaun operativ. Il chantun ha gì l'intenziun da stgaffir regiuns che pon ademplir lur incumbensas effizientamain e svelt, ch'èn ablas da decider e d'agir e che resguardan ils basegns da las abitantas e dals abitants. En ses segund onn presidial vuless la presidenta da la regenza Barbara Janom Steiner ussa survegnir ina impressiun concreta co che las indesch regiuns funcziunan. En il decurs da quest onn vegn ella a visitar tut las regiuns. Il punct cuminaivel da tut las visitas è il barat d'experientschas en il rom d'ina conferenza da las presidentas e dals presidents.

Ils 16 da mars 2017 èn questas visitas vegnidas lantschadas a San Murezzan. La situaziun en la regiun Malögia è spezialmain interessanta. D'ina vart vegnan duvradas là tut las trais linguas chantunalas. Da l'autra vart sa tschentan dumondas spinusas en questa regiun che han stuì vegnir respundidas cun la schliaziun dal circul d'Engiadin'ota per l'onn 2018 u che ston anc vegnir respundidas. Il barat direct cun las presidentas ed ils presidents permetta da vegnir a savair ils quitads e las miserias, ma er ils giavischs da las vischnancas.

La presidenta da la regenza è pudida sa persvader che la conferenza da las presidentas e dals presidents da Malögia funcziuna en moda irreproschabla. La prescripziun chantunala che las presidentas communalas ed ils presidents communals hajan da prender las decisiuns en lur regiun è sa cumprovada, er sche la chargia da lavur per ils presidis è creschida in pau. Las presidentas communalas ed ils presidents communals ston numnadamain communitgar a lur votantas e votants en las vischnancas las consequenzas finanzialas da lur decisiuns e defender talas.

Sco proxima regiun vegn la presidenta da la regenza Janom Steiner a visitar la regiun Plessur.

Fotografia agiuntada:
Barat en il museum engiadinais a San Murezzan


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail: Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas