L'uffizi da sanadad dal Grischun motivescha ensemen cun partenaris Grischunas e Grischuns a partir dal 66. onn da vegliadetgna a dapli moviment en il chantun Grischun. La finamira da l'acziun 66+ è quella da mantegnair e da rinforzar la sanadad dals umans pli vegls.

Activitads corporalas regularas reduceschan la ristga da survegnir pressiun da sang auta, diabetes, mal il dies u osteoporosa, respectivamain da daventar memia grev. Er l'agilitad spiertala vegn trenada. L'uffizi da sanadad dal Grischun s'engascha en differents secturs per promover il moviment en il mintgadi. In'attenziun speziala vegn er dada a la promoziun dal moviment d'umans en la vegliadetgna da senior.

Grischun en moviment: acziun 66+
L'acziun 66+ sa drizza a tut las persunas indigenas cun l'annada 1952 u pli veglias. En ina broschura creada da nov vegnan preschentadas 18 spassegiadas en tut las destinaziuns turisticas dal Grischun. L'acziun 66+ da "Grischun en moviment" metta las spassegiadas intenziunadamain en il center. Numerusas publicaziuns scientificas cumprovan che gia tschintg spassegiadas a 30 minutas per emna promovan la sanadad efficaziamain. Ultra da l'activitad corporala delibereschan las spassegiadas il chau da quitads ed al avran per ideas creativas.
Las spassegiadas proponidas n'èn betg memia grevas e betg memia lungas. Cun las eleger èn vegnidas resguardadas las relaziuns topograficas e climaticas. Tgi che vuless integrar dapli activitad corporala en la spassegiada po far quai natiralmain senza problems.

Ensemen en via
La partenaria principala da l'acziun 66+ è la banca chantunala grischuna. La Südostschweiz funghescha sco partenaria da medias, ils partenaris da transport èn la Viafier retica e l'AutoDaPosta Grischun. Tut las destinaziuns turisticas grischunas han contribuì spassegiadas adattadas. Grazia a l'engaschament cuminaivel èsi sta pussaivel da plazzar en ina broschura ina charta d'accumpagnament che permetta il matg ed il zercladur 2017 a las senioras ed als seniors u ad ina persuna d'accumpagnament da far viadis gratuits dal lieu d'abitar al punct da partenza da las spassegiadas ed enavos. La premissa è ch'ina da las duas persunas ha in bigliet valaivel. Uschia na vegn er la cumpagnia betg a la curta e las senioras ed ils seniors pon er envidar in'ulteriura persuna d'als accumpagnar, er sch'ellas ed els han gia in bigliet. Grazia a questa regulaziun pon las Grischunas ed ils Grischuns pli vegls sa laschar accumpagnar d'autras senioras e seniors, ma er da persunas pli giuvnas.

Trametta ina brev
En ina charta dal cusseglier guvernativ Christian Rathgeb, schef dal departament da giustia, segirezza e sanadad, survegnan tut las 30 000 chasadas cun pèrs u cun persunas che vivan sulettas da 66 onns u pli veglias la broschura cun la charta d'accumpagnament. La finamira da l'acziun è quella da motivar la populaziun d'ir a spass il matg ed il zercladur 2017. Sche 5 pertschient da las senioras e dals seniors pledentads van ina giada a spass, dat quai gia 10 000 spassegiadas.

Ulteriuras infurmaziuns stattan a disposiziun sut www.graubuenden-bewegt.ch ed en la broschura.


Infurmaziuns:
Denise Rudin, manadra da la partiziun "promoziun da la sanadad e prevenziun", uffizi da sanadad dal Grischun, tel. 081 257 64 02, e-mail Denise.Rudin@san.gr.ch


Gremi: uffizi da sanadad dal Grischun
Funtauna: rg uffizi da sanadad dal Grischun