Venderdi passà ha il cusseglier guvernativ Rathgeb visità en il rom da sias visitas d'ospitals e da clinicas 2017 la clinica alpina (CA) ed il Christine Kühne Center for Allergy Research and Education (CK-CARE) da Tavau.

Il cusseglier guvernativ Christian Rathgeb è vegnì beneventà a Tavau ensemen cun il schef da l'uffizi da sanadad, Rudolf Leuthold, e cun il secretari dal departament, Claudio Candinas, da Georg Schäppi, il directur dal CK-CARE, e da Markus Gautschi, il directur la CA. Suenter ina visita da la CA han ils giasts pudì prender enconuschientscha dal svilup positiv e dal dumber creschent da pazientas e pazients da la CA.

Il directur da sanadad Rathgeb ha ludà en spezial la strategia solida concepida a lunga vista en direcziun dal campus da sanadad e d'allergia Tavau. Sin quest campus vegnan en il futur a cooperar en perscrutaziun, tractament e scolaziun la CA, il CK-CARE e l'Institut svizzer da retschertgas davart allergias ed asma ISRA che giauda ina gronda reputaziun internaziunala. Uschia vegnan tratgas a niz optimalmain las sinergias en l'interess da las pazientas e dals pazients d'allergias. Quest concept porscha in grond potenzial er per integrar ulteriurs partenaris da la perscrutaziun e da l'industria, ma er per la collavuraziun cun il WEF. Oravant tut ha Christian Rathgeb ludà il bun sustegn tras la vischnanca da Tavau ed ha suttastritgà la gronda impurtanza dal svilup dal campus per Tavau, per il Grischun e per la Svizra.

Fotografia:

Infurmaziuns:
Cusseglier guvernativ Christian Rathgeb, tel. 081 257 25 01, e-mail Christian.Rathgeb@djsg.gr.ch


Gremi: departament da giustia, segirezza e sanadad
Funtauna: rg departament da giustia, segirezza e sanadad