Dapi l'onn 2013 instruescha il chantun Grischun cussegliaders locals da privels da la natira che entran en acziun en vischnancas en cas da differents eveniments da la natira. In video nov da la chanzlia chantunala mussa a maun da la crudada da grippa en la Val Strem a Sedrun, tge ch'èn las incumbensas d'in cussegliader local da privels da la natira.
En il rom dal management local da privels da la natira instrueschan l'uffizi da guaud e privels da la natira e l'uffizi da militar e da protecziun civila dapi l'onn 2013 cussegliaders locals da privels da la natira (CLP). Quels observan en lur vischnancas il svilup da l'aura, giuditgeschan la situaziun da privels da la natira ed averteschan las autoritads communalas davart svilups privlus. En cas d'in eveniment cusseglian ils CLP il stab directiv communal ed ils pumpiers. Lur enconuschientschas localas e lur experientschas dovran els per la planisaziun da cas d'urgenza, pia per la planisaziun preventiva en cas d'in eveniment. Ils CLP han uschia ina rolla centrala en il management local da privels da la natira sin plaun communal e gidan en moda essenziala a proteger umans e valurs materialas.
En il fratemp s'engaschan 65 CLP scolads en 80 vischnancas da tut las regiuns dal chantun Grischun per la protecziun cunter privels da la natira. Cun quai han l'onn 2017 passa 70 pertschient da las vischnancas grischunas in cussegliader local da privels da la natira. L'instrucziun d'ulteriurs CLP è planisada.
Stadi 2017 da l'instrucziun da cussegliaders locals da privels da la natira en il chantun Grischun.
Experientscha da 4 onns cun CLP
Dapi il cumenzament da l'instrucziun avant 4 onns han ils CLP fatg ina lavur preziusa en differentas situaziuns per dumagnar eveniments. Cun observar e cun giuditgar la situaziun da privel han situaziuns criticas pudì vegnir percepidas e mesiras correspundentas han pudì vegnir prendidas.
Per las vischnancas è in CLP sco persuna da contact en cas da dumondas pertutgant privels da la natira ina clera plivalur, uschia per exempel en cas da la planisaziun d'urgenza u per l'analisa d'ina periclitaziun da la vischnanca. Tuttina resta la natira incalculabla e betg mintga eveniment n'è previsibel u po vegnir dumagnà cun mesiras organisatoricas.
Sco gia en il passà duai er vinavant vegnir promovì il barat d'experientschas tranter ils CLP sco cumplettaziun da l'instrucziun da basa, e quai a chaschun d'occurrenzas spezialas da furmaziun supplementara.
Infurmaziuns:
Roderick Kühne, manader dal project "instrucziun da CLP", uffizi da guaud e privels da la natira, tel. 081 257 38 78, e-mail Roderick.Kuehne@awn.gr.ch
Gremi: uffizi da guaud e privels da la natira
Funtauna: rg uffizi da guaud e privels da la natira