Il center "Bahnhöfli" a Trimmis avra sonda, ils 17 da zercladur 2017, tranter las 11.00 e las 15.00 sias portas. Persunas interessadas pon dar in'egliada en il center da transit e discurrer cun sias abitantas e ses abitants. Las visitadras ed ils visitaders pon sa legrar d'in viadi cultural e culinaric enturn il mund.
Dapi onns maina l'uffizi da migraziun e da dretg civil en differents lieus en il chantun alloschis collectivs per persunas dal sectur d'asil. Dapi il matg 2016 èn vegnids averts centers da transit a Mustér, a Trimmis ed a Spleia. A la gestiunaria statti zunt a cor da mussar a la populaziun indigena, co ch'in tal manaschi funcziuna. Pervia da quai vegnan organisads dis da las portas avertas en ils centers da transit. Il zercladur 2016 è vegnì avert il center da transit "Bahnhöfli" sin il territori communal da Trimmis. Ultra per collocar en moda convenziunala requirents d'asil serva il center er per dar alloschi a requirents d'asil minorens betg accumpagnads sco er per manar in'atgna scola. Sonda, ils 17 da zercladur 2017, tranter las 11.00 e las 15.00, avra il center ussa sias portas, e persunas interessadas pon dar in sguard en il center da transit e discurrer cun sias abitantas e ses abitants. Cun grond plaschair e bler engaschi han las requirentas ed ils requirents d'asil preparà in pèr chaussas per questa occurrenza. Las visitadras ed ils visitaders pon sa legrar d'in pitschen viadi cultural e culinaric enturn il mund. I vegnan purschidas delicatessas tipicas da differents pajais. Las visitadras ed ils visitaders survegnan er ina invista dal mintgadi betg adina facil en il center da transit, nua che persunas da las culturas las pli differentas vivan ensemen.
Infurmaziuns:
- Marcel Suter, manader da l'uffizi da migraziun e da dretg civil dal Grischun, tel. 081 257 25 21, e-mail
Marcel.Suter@afm.gr.ch
- Georg Carl, manader da la partiziun "asil e return", tel. 081 257 25 49, e-mail
Georg.Carl@afm.gr.ch
Gremium: uffizi da migraziun e da dretg civil
Funtauna: uffizi da migraziun e da dretg civil