En connex cun lavurs da construcziun sin la via dal Luzisteig en la citadina da Maiavilla èn – il cumenzament da zercladur – resultads chats archeologics che vegnan analisads ussa pli detagliadamain dal servetsch archeologic dal Grischun. Per pudair far questas analisas en moda cumplessiva, vegn la via dal Luzisteig probablamain serrada per ulteriuras duas emnas.

Dapi mez avrigl 2017 saneschan il chantun Grischun e la citad da Maiavilla la salaschada en la citadina da Maiavilla. A medem temp vegn construida ina colliaziun privata tranter la chasa Brügger / von Sprecher e la garascha sutterrana "Klosterhof".

En connex cun las lavurs da stgavament per questa colliaziun èn vegnidas chattadas en la zona d'archeologia restanzas istoricas d'ina chanalisaziun, ruinas dal mir e dal foss al vest da la citad e da l'uschenumnà "Churer Tor". Questa structura fitg cumplexa che sa cumpona da divers mirs e da divers sistems da chanalisaziun basegna ulteriuras analisas ed ina documentaziun exacta tras il servetsch archeologic dal Grischun, pervia da las intervenziuns architectonicas previsas.

Questas analisas retardeschan la construcziun da la nova colliaziun sco er la sanaziun da la salaschada. Per quest motiv sto la via dal Luzisteig ch'ins aveva previs da serrar fin ils 14 da fanadur 2017, probablamain restar serrada fin la fin da fanadur 2017. Per vehichels fin 7,5 tonnas è signalisada vinavant ina guntgida sur vias da quartier a Maiavilla, per il traffic pesant sco er per autocars da passa 7,5 tonnas e d'ina lunghezza da passa 9 meters datti ina guntgida signalisada sur la via naziunala tras Ragaz Bogn e Fläsch.

La fermada da bus "Im Loretscher" na po betg vegnir servida durant lavurs da construcziun. Quai vala er per la fermada "Maiavilla Posta" sin il traject tar e da la staziun da Maiavilla.

Las interpresas participadas a la construcziun ed il chantun Grischun supplitgeschan ils participants dal traffic d'avair la chapientscha duida per eventualas restricziuns e per eventuals retards durant questas lavurs da construcziun.

Fotografia agiuntada:

En connex cun lavurs da construcziun en la citad da Maiavilla èn vegnidas a la glisch restanzas da la porta istorica "Churer Tor".


Infurmaziuns:

Concernent la serrada da la via
Elia Lardi, responsabel per las medias, uffizi da construcziun bassa,tel. 081 257 37 10, e-mail Elia.Lardi@tba.gr.ch

Concernent ils chats archeologics
Christoph Walser, manader da la perscrutaziun architectonica e dal terren, servetsch archeologic dal Grischun, tel. 081 257 48 57, e-mail Christoph.Walser@adg.gr.ch


Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun