Cun las prescripziuns da chatscha 2017 ha la regenza grischuna relaschà plans da prelevaziun auts per ils tschiervs ed – en il senn d'in project da pilot – facilitaziuns da chatscha per il district da chatscha XI Signuradi-Partenz. Da nov vegn introducì in obligatori da purtar vestgadira luminusa sin la chatscha en gruppas. Ultra da quai vegnan concretisadas las prescripziuns per ils giasts da chatscha auta.

Mantegnair il squitsch da chatscha
Ils effectivs da tschiervs sa chattan anc adina a la limita maximala en tschertas regiuns, e quai malgrà il dumber fitg grond d'animals sajettads l'onn passà. Ils problems considerabels cun la regiuvinaziun natirala dal guaud e l'augment d'annunzias da donns da l'agricultura cumprovan quest fatg. Malgrà che las dumbraziuns han mussà passa 1000 tschiervs damain che l'onn precedent, vegni stimà ch'ils effectivs sajan tuttina auts. Per cuntanscher ina reducziun suenter la stabilisaziun, vegn il plan da prelevaziun augmentà da 5210 sin 5370 tschiervs. Ultra da quai vegni cuntinuà cun la cultivaziun dals asils da selvaschina en tut il chantun, ed il tschierv cun curuna dad omaduas varts dastga vegnir sajettà da nov durant trais dis.

Facilitaziuns da chatscha per il district da chatscha XI Signuradi-Partenz
En il district da chatscha XI Signuradi-Partenz vegn il squitsch da chatscha sin il tschierv augmentà supplementarmain, er perquai che la tuberculosa smanatscha da vegnir importada. En il senn d'in project da pilot vegnan – en nov asils da selvaschina – animals feminins che na mainan betg e tschiervs lantschet independentamain da la lunghezza da lur corna dads liber per sajettar durant ils emprims trais dis da chatscha. Questa nova regulaziun vala fin ils 10 da settember en tut il district da chatscha XI er ordaifer ils asils da selvaschina senza ina restricziun da la quantitad. Interessanta vegn ad esser la dumonda, tge effect che questas mesiras han en connex cun il dumber da taurs-tschierv da dus onns sajettads l'onn 2018 ed en connex cun il dumber d'animals sajettads l'onn 2019. En in perimeter generus enturn ils guauds da protecziun donnegiads da St. Antönien pon ins sajettar tut ils tschiervs masculins durant l'entira chatscha auta. La chatscha sin chavriels e sin chamutschs vegn adattada mo en paucs puncts.

Da verd ad oransch
Per las chatschas en gruppas durant la chatscha auta e durant la chatscha speziala èsi da nov obligatoric da purtar vestas u giaccas da segirezza luminusas ubain ina cuvrida-chau en colurs luminusas. Qua tras vegn augmentada la segirezza per las persunas ch'èn participadas a las chatschas en gruppas. La restricziun da la grondezza da la gruppa a quatter participantas e participants vegn abolida per la chatscha auta e per la chatscha speziala, per la chatscha bassa percunter vegn ella mantegnida.

Giasts da chatscha èn bainvegnids
Cun la revisiun parziala da la lescha chantunala da chatscha daventa l'introducziun d'ina carta da giasts per sa participar durant tscherts dis a la chatscha auta en il Grischun ussa realitad. La regenza ha concretisà las modalitads correspundentas. Mintga chatschadra e mintga chatschader ch'è en possess da la patenta da chatscha auta 2017 po envidar per dus dis in giast da chatscha che po alura ir a chatscha cun ella u cun el sin ses contingent. La chatschadra ospitanta u il chatschader ospitant survegn dal giast da chatscha ils documents necessaris (data da la participaziun, conferma ch'i na sajan avant maun nagins motivs d'exclusiun, copias dal dretg svizzer d'ir a chatscha, da l'assicuranza da responsabladad valaivla e dal document da tir valaivel). La chatschadra ospitanta u il chatschader ospitant retira l'avust u durant l'emna senza chatscha il settember sia patenta da chatscha ed a medem temp la carta da giasts per ils dis da catscha giavischads. Areguard l'equipament da chatscha ed areguard il diever da vehichels a motor ha il giast da chatscha ils medems dretgs e las medemas obligaziuns sco tut las chatschadras ed ils chatschaders grischuns. Quest onn na vegn il dumber da cartas da giasts betg limità, perquai ch'ins vul l'emprim rimnar experientschas cun questa novaziun.


Infurmaziuns:
- Cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 14, e-mail Mario.Cavigelli@bvfd.gr.ch
- Georg Brosi, schef da l'uffizi da chatscha e pestga, tel. 081 257 38 92, e-mail Georg.Brosi@ajf.gr.ch


Gremi: uffizi da chatscha e pestga dal Grischun
Funtauna: rg uffizi da chatscha e pestga dal Grischun