Las structuras communalas en il Grischun èn vegnidas fermamain en moviment ils ultims 15 onns. En consequenza da numerusas fusiuns da vischnancas è il dumber da vischnancas sa reducì a bunamain la mesadad dapi la midada dal millenni. Ussa èsi temp d'analisar la situaziun. Per quest intent vegnan evaluadas indicaziuns da las administraziuns communalas sco er datas accessiblas publicamain. Plinavant vegn interrogada er la populaziun da las vischnancas fusiunadas.

Ord vista chantunala è arrivà il dretg mument per retschertgar las consequenzas da las fusiuns. In rapport davart l'efficacitad n'è betg prescrit da la lescha per la refurma da vischnancas. Tuttina duai vegnir suttamess al cussegl grond l'onn 2019 in rapport davart las structuras communalas. Il chantun e la scola auta da tecnica ed economia (SATE) Cuira prendan per mauns cuminaivlamain questa incumbensa.

Il center per management d'administraziun (CMA) da la SATE Cuira ha elavurà in'uschenumnada "controlla da las fusiuns" che vegn gia applitgada en ils chantuns Glaruna, Berna e Turitg. Cun agid da differents indicaturs duai vegnir mesirà l'effect da las fusiuns da vischnancas. La gronda part dals 27 indicaturs duvrads per il chantun Grischun po vegnir elavurada sin basa da datas ch'èn avant maun tar il chantun. Supplementarmain ston las chanzlias communalas e la populaziun dentant respunder intginas dumondas, per che la controlla da las fusiuns daventia uschè expressiva sco pussaivel. Las abitantas ed ils abitants da las vischnancas fusiunadas survegnan in questiunari ch'els pon emplenir en moda anonima.

La presidenta da la regenza supplitgescha la populaziun da sa participar activamain a l'enquista e da prestar uschia ina contribuziun essenziala per il success da quest project. Ella engrazia a la populaziun per ses engaschi. Ils resultats da la controlla da las fusiuns vegnan integrads en il rapport davart las structuras communalas. Quel vegn elavurà da la regenza per mauns dal cussegl grond.


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: departament da finanzas e vischnancas
Funtauna: rg departament da finanzas e vischnancas