Ils 31-12-2016 vivevan en il chantun Grischun permanentamain 197 550 abitantas ed abitants, 940 dapli che l'onn precedent. Sco durant ils onns precedents è l'augment d'attribuir quasi exclusivamain a la creschientscha da la populaziun estra.

Vinavant in augment da la populaziun sut la media
L'onn passà ha il Grischun puspè pudì augmentar levamain il dumber da sia populaziun, cun 0,5 pertschient è la rata da creschientscha stada minimalmain pli auta che l'onn precedent. En cumparegliaziun cun la Svizra (1,1 pertschient) s'augmenta la populaziun dentant er vinavant sut la media. Entant che tschintg chantuns han gì l'onn 2016 ina creschientscha pli pitschna ch'il Grischun, è la populaziun s'augmentada il pli ferm en ils chantuns Argovia, Zug e Vad.

Creschientscha cunzunt en l'aglomeraziun
Tant en cifras absolutas sco er procentualmain il pli fitg è s'augmentà il dumber da la populaziun entaifer il Grischun en las duas regiuns Plaun e Landquart, questa tendenza dals ultims onns cuntinuescha.
In pau damain populaziun che avant in onn han mussà la fin da l'onn 2016 mo las trais regiuns Malögia, Engiadina bassa/Val Müstair sco er minimalmain Partenz/Tavau.

Funtauna: uffizi federal da statistica (STATPOP)
Populaziun permanenta per ils 31-12-2016 tenor regiuns sco er midadas procentualas l'onn 2016

La citad da Cuira ha quintà la fin da l'onn 2016 34 880 abitantas ed abitants permanents, 228 dapli che avant in onn. Da las diesch vischnancas las pli grondas en il chantun è creschida la vischnanca da Domat procentualmain il pli fitg cun bundant 2 pertschient e quinta ussa per l'emprima giada dapli che 8000 abitantas ed abitants permanents. Pers in pau da lur populaziun han zunt bleras vischnancas turisticas.

La pli pitschna vischnanca politica è stada la fin da l'onn 2016 Lon cun 44 abitantas ed abitants, tut en tut han mo pli otg vischnancas grischunas main che 100 abitantas ed abitants.

Augment da la populaziun estra
L'onn 2016 èn vegnidas registradas 1806 naschientschas en il Grischun, 58 dapli che l'onn precedent ed uschè bleras sco mai dapi l'onn 2000. A medem temp è sa reducì il dumber da mortoris (1624) en cumparegliaziun cun l'onn precedent per l'emprima giada dapi sis onns puspè, quai ha chaschunà in surpli da naschientschas da 182 persunas. La discrepanza tranter la populaziun svizra e la populaziun estra en media cleramain pli giuvna è frappanta.

L'augment da la populaziun vegn dominà vinavant da l'immigraziun internaziunala. 4269 persunas immigradas da l'exteriur envers 2600 partenzas, il saldo è cun 1669 minimalmain pli pitschen che l'onn precedent.

Il saldo da migraziun interchantunal grischun percunter è restà er l'onn 2016 negativ – i partan cleramain dapli persunas davent dal Grischun en auters chantuns che viceversa. Plinavant han l'onn 2016 530 persunas survegnì il dretg da burgais svizzer en il Grischun.

Funtauna: uffizi federal da statistica (STATPOP/BEVNAT)
Cumponentas dal svilup da la populaziun en il chantun Grischun l'onn 2016

Diminuziun dals Portugais e dals Tudestgs
Il Grischun quintava fin la fin da l'onn 2016 36 618 abitantas ed abitants esters, quai è ina quota da 18,5 pertschient da la populaziun permanenta. Da las gruppas da la populaziun las trais cun distanza las pli grondas, che quintan ensemen dus terzs dal dumber d'estras e d'esters, è s'augmentà l'onn 2016 mo il dumber dals burgais talians, entant ch'il dumber da burgais tudestgs e portugais è sa diminuì. Augments pli gronds vegnan registrads da l'Afganistan, da l'Eritrea e da la Siria. Tut en tut abitan en il Grischun vinavant persunas da bundant 130 differentas naziuns.

Ils resultats detagliads da las statisticas da la populaziun da tut las vischnancas e da tut las regiuns sco er ulteriuras infurmaziuns stattan a disposiziun sin la pagina d'internet da l'uffizi per economia e turissem, vesair (Statistik und Register).


Infurmaziuns:
Patrick Casanova, manader da la partiziun "statistica e registers", uffizi per economia e turissem, tel. 081 257 23 74, e-mail Patrick.Casanova@awt.gr.ch


Gremi: uffizi per economia e turissem dal Grischun
Funtauna: rg uffizi per economia e turissem dal Grischun