La regenza pussibilitescha in access simpel ad infurmaziuns tar bains immobigliars ed ha approvà in project cunter privels da la natira da la vischnanca dad Arosa. Plinavant ha ella concedì la permissiun per svidar in lai da fermada.
Access simpel ad infurmaziuns tar bains immobigliars
Tgi che posseda terren en Svizra na po betg utilisar quel sco ch'el vul. Proprietarias e proprietaris ston observar las cundiziuns generalas ch'il legislatur e las autoritads prescrivan. En quest reguard sto vegnir resguardà in grond dumber da leschas, d'ordinaziuns e da restricziuns uffizialas, uschenumnadas restricziuns da la proprietad da dretg public (RPDP). Per simplifitgar l'access a tschertas RPDP, ston quellas vegnir unidas en in cataster RPDP e rendidas accessiblas al public fin la fin da l'onn 2019. La regenza ha approvà per quest intent la cunvegna da program 2017–2019 dal cataster RPDP tranter la confederaziun svizra ed il chantun Grischun.
Per il chantun Grischun resulta cun quest cataster RPDP ina plivalur dubla envers la situaziun actuala. Uschia sa chattan las RPDP las pli impurtantas en in lieu central ed èn accessiblas en moda simpla, quai che signifitga ina simplificaziun considerabla en spezial per l'economia privata e per las autoritads. Tras la preparaziun da las datas colliada cun quai vegn cuntanschida supplementarmain in'auta qualitad da las unitads da datas chantunalas e communalas. Grazia al cataster croda davent la lavur fin ussa inevitabla da sa procurar tar ils posts cumpetents las singulas RPD per in bain immobigliar, da las rimnar, da las cumparegliar ina cun l'autra e da las cumbinar. En Svizra datti passa 150 differentas restricziuns da la proprietad da dretg public. Sin plaun federal vegnan integradas en l'emprima fasa en il cataster las 17 restricziuns da la proprietad da dretg public las pli impurtantas dad otg secturs: lieus contaminads, viafiers, plazzas aviaticas, protecziun da l'aua sutterrana, canera, vias naziunalas, planisaziun dal territori e guaud.
Ulteriuras infurmaziuns tar il cataster RPDP
Dus rempars da deviaziun per l'aual a Langwies
La regenza grischuna ha approvà il project "Rempar d'aual Chüpfen" da la vischnanca dad Arosa e l'ha concedì ina contribuziun chantunala da maximalmain 94 000 francs per tal. La finamira dal project è quella da garantir la protecziun da l'aclaun Chüpfen. La stad 2015 hai dà ferms urizis en la Val Sapün che han chaschunà bovas en il Hauptertällibach sco er en singuls da ses auals laterals. En quest connex è l'aclaun Chüpfen vegnì inundà e cuvert cun gera. Il letg da l'aual è da quel temp vegnì deliberà immediatamain da gera e crappa, tuttina cuntegna el anc adina bler material gist en il sectur da l'aclaun. Tar mintga plievgia pli gronda stoi perquai vegnir fatg quint cun ulteriuras sedimentaziuns. Per reducir quest privel vegn il territori segirà cun dus rempars da deviaziun sin ina lunghezza totala da 230 meters.
L'aclaun Chüpfen suenter l'eveniment da la stad 2015
Il batschigl d'accumulaziun Isla vegn svidà per lavurs da reparaziun
Sut tschertas cundiziuns ha la regenza concedì a la firma Arosa Energie la permissiun da derschentar e da svidar il batschigl d'accumulaziun Isla ad Arosa. Igl è necessari da svidar il batschigl d'accumulaziun per pudair reparar l'uschenumnada protecziun da l'affluent e per far lavurs da sanaziun vi dal conduct da costa e da pressiun. La svidada è previsa per il cumenzament da settember 2017. Alura vegnan fatgas las lavurs da reparaziun ch'èn probablamain terminadas suenter sis emnas.
Grazia ad in prerempar ch'è vegnì realisà avant 20 onns èsi garantì ch'ina part dal lai resta er suenter la sbassada. En quel po vegnir retegnida ina part dals peschs. L'ultima svidada è vegnida fatga l'onn 2011 senza incaps. La svidada da quest settember vegn fatga en la medema moda e maniera.
©Uffizi federal da topografia
Nagina votaziun federala e chantunala dal pievel ils 26 da november 2017
La regenza ha prendì enconuschientscha dal fatg ch'i na dat nagina votaziun federala dal pievel ils 26 da november 2017. Il cussegl federal ha decidì da betg duvrar quest termin da votaziun. Er sin plaun chantunal n'è nagin project pront per la votaziun a quest termin. Ils 26 da november 2017 n'ha perquai er lieu nagina votaziun chantunala dal pievel.
Gremi: regenza
Funtauna: rg chanzlia chantunala dal Grischun