Ils ultims dus onns èn sa participadas nov IPM da las regiuns Alvra, Surselva e Viamala cun radund 600 collavuraturas e collavuraturs al project "IPM regio: structuras favuraivlas per famiglias sco factur da success". Uschia han ellas gidà activamain a sviluppar ed ad extender cundiziuns da lavur favuraivlas per famiglias en lur manaschi. Gievgia, ils 14 da settember 2017, vegn il project terminà cun in'occurrenza finala publica a partir da las 17.00 en la halla karbid a Tusaun.

En tut las branschas exista ina mancanza da forzas spezialisadas, e questa mancanza daventa anc pli critica pervia da la situaziun periferica dal chantun. Per pudair subsister en la concurrenza dovri bunas cundiziuns generalas. In factur pli e pli impurtant daventa en quest connex er la meglra cumpatibilitad da la professiun cun la famiglia per dunnas e per umens.

Structuras favuraivlas per famiglias en la pratica
L'occurrenza finala dat invistas concretas e respostas tge experientschas che quests manaschis han fatg en il rom dal project IPM, tge success ch'els han cuntanschì e tge sfidas che spetgan. Plinavant vegn preschentada per l'emprima giada ina broschura davart ils manaschis ch'èn sa participads fin ussa al program e davart lur vias a structuras pli favuraivlas per famiglias.
L'occurrenza sa drizza ad IPM, a persunas ch'èn responsablas per il persunal, a persunas da la politica e da l'economia sco er a lavurantas e lavurants che s'engaschan per mesiras economicas innovativas e favuraivlas per famiglias e ch'èn interessads vi d'ina ballantscha prosperaivla tranter famiglia e professiun.

Program d'acziun: Structuras favuraivlas per famiglias sco factur da success
Il program d'acziun ch'è vegnì lantschà l'onn 2010 dal post da stab per l'egualitad da las schanzas ha cumenzà en la Val dal Rain da Cuira (2010‑2014) cun nov manaschis e radund 700 collavuraturas e collavuraturs. L'onn 2015 è il project vegnì purtà en las regiuns en collavuraziun cun ils promoturs regiunals da l'economia. La finamira dal program è quella da laschar profitar las IPM localas – sut l'accumpagnament professiunal dal post spezialisà UND – da las experientschas ch'èn vegnidas fatgas durant blers onns en autras firmas ed en autras regiuns. Ultra da quai duai vegnir stgaffida la conscienza per ils aspects positivs economics da cundiziuns da lavur favuraivlas per famiglias. Il program vegn finanzià dal chantun Grischun, da la confederaziun e da las regiuns.

Questas IMP èn da la partida:

En la regiun Alvra: Bossi und Hemmi AG, Casti; Puracenter AG / Spar, Lai; Poltera Holzbau AG, Tinizong

En la regiun Surselva: Wäscheria Textil Service AG, Glion; Spitex Foppa, Glion

En la regiun Viamala: Bühler AG Transporte und Recycling, Tusaun; Ospital da Tusaun; Fundaziun Scalottas, Scharàns; CSD Ingenieure AG, Tusaun


Ulteriuras infurmaziuns chattais Vus en l'invitaziun a l'occurrenza finala sco er sin www.stagl.gr.ch, www.und-online.ch e www.berufundfamilie.admin.ch


Infurmaziuns:
Susanna Mazzetta, manadra dal project, post da stab per l'egualitad da las schanzas, tel. 081 257 35 72, mob. 079 483 74 01, e-mail Susanna.Mazzetta@stagl.gr.ch


Gremi: post da stab per l'egualitad da las schanzas
Funtauna: rg post da stab per l'egualitad da las schanzas