Il mars 2016 ha la regenza concludì d'introducir il Plan d'instrucziun 21 per il cumenzament da l'onn da scola 2018/19 en il chantun Grischun e da laschar translatar quel en rumantsch ed en talian. Las translaziuns èn ussa avant maun, stgars in onn avant l'introducziun. Tuts trais plans d'instrucziun grischuns pon vegnir consultads online a partir d'immediat sut www.lehrplan.ch.

Il Plan d'instrucziun 21 GR è vegnì translatà cumplettamain en rumantsch ed en talian dal servetsch da translaziuns da la chanzlia chantunala dal Grischun. Excepziuns èn ils plans d'instrucziun "Tudestg en scolas rumantschas" e "Terza lingua estra" ch'èn avant maun en tudestg.

Cunvegnientschas tranter il servetsch da translaziuns dal chantun e la scola auta da pedagogia dal Grischun han permess d'etablir ina terminologia unitara en tuttas trais linguas chantunalas. Uschia vegn facilitada la communicaziun davart il Plan d'instrucziun 21 GR en las differentas instituziuns participadas. Novas noziuns èn ultra da quai vegnidas surdadas a la banca da datas terminologica da l'administraziun federala. Questa banca da datas cumpiglia endataziuns en tut las quatter linguas naziunalas sco er en englais. Questas cundiziuns generalas promovan d'etablir cun success novas noziuns en il mintgadi da las duas linguas minoritaras dal Grischun. Las translaziuns èn vegnidas controlladas da spezialistas e spezialists che han ina relaziun cun la pratica.

Plan d'instrucziun 21 GR en rumantsch
Il Plan d'instrucziun 21 GR per il stgalim secundar I è vegnì translatà cumplettamain er en rumantsch. Ensemen cun ina glista supplementara da noziuns en sursilvan ed en ladin porscha la translaziun ina terminologia cumplessiva che po vegnir implementada cun success – en connex cun il Plan d'instrucziun 21 GR – en tut ils roms. La glista da las noziuns po vegnir consultada sin la pagina d'internet da l'uffizi per la scola populara ed il sport: www.avs.gr.ch  


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail Martin.Jaeger@ekud.gr.ch
- Nicole Merz, direcziun dal project Plan d'instrucziun 21 GR, uffizi per la scola populara ed il sport, tel. 081 257 30 60, e-mail Nicole.Merz@avs.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient