L'occurrenza commemorativa ha lieu mesemna, ils 22 da november 2017, tar la stalla dal Waldhaus a Cuira. Cunzunt las victimas da mesiras repressivas per motivs da provediment e da plazzaments en in lieu ester èn envidadas cordialmain a questa occurrenza. En il rom da questa occurrenza commemorativa vul la regenza sa perstgisar tar las victimas per l'ingiustia commessa e metter in segn da regurdientscha.

Fin l'onn 1981 èn daventads en Svizra ed en il Grischun uffants, giuvenils e persunas creschidas victimas da mesiras repressivas per motivs da provediment e da plazzaments en in lieu ester. Bleras persunas pertutgadas han subì ina grond donn. Quai ha marcà e marca anc adina decisivamain lur vita. La regenza vul ussa rugar las victimas per perdun e promover la renconuschientscha da las circumstanzas difficilas. Ella spera perquai che bleras persunas pertutgadas sa participeschian a l'occurrenza commemorativa.

Segn da regurdientscha
Per bleras victimas da mesiras repressivas per motivs da provediment e da plazzaments en in lieu ester che pateschan per part fin oz da las consequenzas da quai ch'ellas han stuì far tras, èsi in giavisch che quai ch'è capità na vegnia betg emblidà. In segn da regurdientscha duai commemorar las victimas, duai gidar a render conscient en la publicitad las painas supportadas e l'ingiustia commessa e duai sensibilisar per ch'ina tala ingiustia na capitia mai pli. Per stgaffir in tal segn da regurdientscha è vegnida nominada ina gruppa che sa cumpona da persunas pertutgadas e da spezialistas e spezialists e che ha l'incumbensa da proponer a la regenza segns da regurdientscha degns ed adequats en il chantun.

Occurrenza commemorativa per las victimas
En il num da la regenza vegn il cusseglier guvernativ Jon Domenic Parolini a realisar l'occurrenza commemorativa ed ad annunziar il segn da regurdientscha. L'occurrenza commemorativa ha lieu mesemna, ils 22 da november 2017, a las 10.00 tar la stalla dal Waldhaus a Cuira. L'occurrenza dura circa in'ura. Suenter vegn servì in aperitiv.


Infurmaziun per collavuraturas e collavuraturs da las medias:
Nus envidain las collavuraturas ed ils collavuraturs da las medias d'accumpagnar l'occurrenza cun lur media. Plazzas da parcar datti tar la stalla dal Waldhaus e sin l'areal da la clinica Waldhaus.


Infurmaziuns:
cusseglier guvernativ dr. Jon Domenic Parolini, schef dal departament d'economia publica e fatgs socials, tel. 081 257 23 01, e-mail Jondomenic.Parolini@dvs.gr.ch


Gremi: regenza
Funtauna: departament d'economia publica e fatgs socials