La regenza ha deliberà la missiva tar la revisiun parziala da la lescha davart ils dretgs politics en il chantun Grischun (LDPC) per mauns dal cussegl grond. La revisiun duai puspè pussibilitar il e voting er en il chantun Grischun.

Tras questa revisiun parziala da la lescha davart ils dretgs politics en il chantun Grischun duain sco emprim vegnir stgaffidas las basas giuridicas chantunalas necessarias per pudair introducir il e voting sco terz chanal da votaziun ordinari sin tut ils plauns statals. En in segund pass, previsiblamain l'onn 2018, duai lura vegnir acquistà in sistem dad e voting ch'è admess per l'integraziun da 100 pertschient da las persunas cun dretg da votar. En quest connex ha la segirezza l'emprima prioritad. Il sistem sto satisfar a las pretensiuns da segirezza maximalas da la confederaziun ed esser certifitgà tras in servetsch independent accredità da la confederaziun (SAS). L'introducziun e la derasaziun èn planisadas sco terz pass en duas fasas: L'onn 2020 duai cumenzar ina "fasa da pilot" cun sis vischnancas ed a partir da l'onn 2021 è planisada la derasaziun cuntinuada sin ulteriuras vischnancas. Las vischnancas duain pudair decider sezzas, sche ed en tge dimensiun ch'ellas vulan introducir il e voting (cun u senza votaziuns communalas). Vischnancas che introduceschan il e voting duain survegnir contribuziuns chantunalas unicas per far las adattaziuns necessarias da lur software.

Procedura d'annunzia per far diever dal e voting
In punct central da questa revisiun parziala è la procedura d'annunzia ch'è planisada per las persunas cun dretg da votar per far diever dal e voting. Persunas che vulan votar online ston l'emprim sa registrar. Plinavant è planisada ina procedura d'annunzia per candidatas e candidats en cas d'elecziuns da maiorz sin plaun chantunal u regiunal. Uschia vegnan stgaffidas las premissas necessarias per introducir la votaziun electronica per elecziuns. Tras questas regulaziuns vegni ad esser pussaivel da profitar dal cumenzament ennà dal e voting cun pauc palpiri (mo attest da votar sin palpiri) e da trair a niz ils avantatgs da la IT tar la votaziun e tar la dumbraziun. Tuts dus puncts portan respargns, cunzunt tar las vischnancas. Tras quests respargns pon ils custs dal e voting vegnir cuntrafinanziads almain per part. Ed ils respargns vegnan ad esser anc pli gronds, cur che las pussaivladads tecnicas per il e voting senza palpiri èn avant maun.

Il e voting cumplettescha las pussaivladads da votar convenziunalas existentas (votaziun persunala e votaziun per correspundenza). Ed ins sto far quint ch'il e voting vegnia a remplazzar durant ils proxims onns pli e pli fitg ils chanals da votaziun convenziunals – parallelamain al svilup digital en auters secturs da la societad. Il e voting ha numnadamain differents avantatgs:
- votar cumadaivlamain ed independentamain dal lieu
- facilitaziun per persunas cun impediments
- verificabilitad da la vusch
- impediment da votaziuns nunvalaivlas
- eruida pli svelta e pli segira dals resultats, damain lavur per ils biros electorals

Il cussegl grond vegn a tractar il project en la sessiun da favrer 2018. La lescha duai entrar en vigur il 1. da schaner 2020.

Agiunta:
missiva


Infurmaziuns:
cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch


Gremi: regenza
Funtauna: chanzlia chantunala dal Grischun