La regenza grischuna ha deliberà il sboz tar ina revisiun parziala da la lescha chantunala da taglia e da la lescha davart las taglias communalas e davart las taglias da baselgia. La taglia chantunala actuala sin l'ierta duai vegnir midada ad ina taglia sin la part d'ierta e vegnir coordinada cun la taglia communala sin la part d'ierta.

En il dretg vertent incassescha il chantun ina taglia sin il relasch ed ina taglia sin donaziuns e las vischnancas pon incassar ina taglia sin la part d'ierta ed ina taglia sin donaziuns. Cun la taglia sin il relasch vegn il relasch imputabel – per quant ch'el pervegn a retschaviders obligads da pajar taglia – suttamess sco totalitad a la taglia, e quai per ina tariffa unitara dad actualmain 10 pertschient. Cun la taglia sin la part d'ierta vegn registrada l'assegnaziun als singuls ertavels e las tariffas da taglia dependan dal grad da parentella envers il testader. Sin fundament d'ina incumbensa acceptada dal cussegl grond duai il chantun medemamain midar ad ina taglia sin la part d'ierta e sin donaziuns.

Sch'il chantun e las vischnancas incasseschan ina taglia identica, ston vegnir unifitgads tant la legislaziun sco er l'incassament. Il project prevesa ina regulaziun legala definitiva en il dretg chantunal. Las vischnancas pon per l'ina decider, sch'ellas vulan incassar ina taglia sin l'ierta e sin donaziuns, e per l'autra fixar las tariffas da taglia en il rom dals imports chantunals maximals. L'incassament da la taglia vegn delegà a l'administraziun chantunala da taglia, perquai ch'ina cumpetenza da las vischnancas na vegn betg giuditgada sco cunvegnenta pervia dal pitschen dumber da cas.

Survista da las midadas las pli impurtantas:
- il chantun incassescha da nov ina taglia sin la part d'ierta e sin donaziuns;
- las vischnancas mantegnan lur suveranitad fiscala; ellas pon incassar vinavant ina taglia sin la part d'ierta e sin donaziuns e fixar l'autezza da las tariffas da taglia en il dretg communal;
- ultra dals conjugals e dals uffants vegnan liberads subjectivamain da l'obligaziun da pajar taglia er ils geniturs ed ils pèrs en concubinat; quai correspunda a la regulaziun en la maioritad da las vischnancas;
- per il tschep dals geniturs (fragliuns, nevs, nezzas e.u.v.) vegn incassada ina tariffa da taglia reducida che importa en il chantun 5 pertschient ed en las vischnancas (sco oz) maximalmain 5 pertschient;
- per ils ulteriurs retschaviders vegn la tariffa da taglia fixada per il chantun sin 15 pertschient (fin ussa 10 pertschient) e per las vischnancas sin maximalmain 20 pertschient (fin ussa 25 pertschient).

La tariffa da taglia pli bassa per il tschep dals geniturs e l'augment da la tariffa da taglia per ils ulteriurs retschaviders sco er la liberaziun da taglia dals geniturs chaschunan entradas pli pitschnas per il chantun da tut en tut 3,5 fin 4 milliuns francs. Cuntrari a la taglia sin il relasch na po la taglia sin la part d'ierta dal chantun betg pli vegnir reducida da la basa da calculaziun da la taglia communala sin la part d'ierta, quai che augmenta tala per 10 pertschient. Las vischnancas pon quintar tut en tut cun entradas levamain pli autas.

La consultaziun dura fin la fin da favrer. Ils documents respectivs pon vegnir consultads en l'internet sut "Consultaziuns currentas". La revisiun parziala duai entrar en vigur il 1. da schaner 2020.


Infurmaziuns:
- presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch
- Urs Hartmann, manader da l'administraziun da taglia, tel. 081 257 33 24, e-mail Urs.Hartmann@stv.gr.ch


Gremi: regenza
Funtauna: rg chanzlia chantunala dal Grischun