Sin invit dal cusseglier guvernativ Christian Rathgeb ha gì lieu gia per la sisavla giada la scuntrada da contact "generals grischuns" tranter represchentants da l'armada e dal departament da segirezza.
A questa occurrenza èn sa scuntrads represchentants dal militar d'aut rang che derivan dal chantun Grischun u che cumondan truppas grischunas. Preschents èn ultra da quai er stads represchentants dal departament da giustia, segirezza e sanadad ch'è responsabel per ils fatgs dal militar en il Grischun.
La scuntrada ha servì al barat vicendaivel d'infurmaziuns e d'ideas. Grazia a la realisaziun da l'ulteriur svilup da l'armada vegnan mantegnidas e modernisadas las plazzas d'armas grischunas. La logistica per las truppas che fan lur servetsch en il chantun Grischun vegn meglierada. L'onn 2018 vegnan puspè absolvids vers 200 000 dis da servetsch. A partir dal schaner 2018 survegn il Grischun il commando da la brigada d'infantaria mecanisada 11, da la quala il cumandant brigadier Brülisauer ha annunzià il transferiment da ses commando da Winterthur a Cuira.
En il center dals discurs steva però la collavuraziun tranter il chantun e la confederaziun resp. l'armada en cas d'eveniments extraordinaris sco il dumogn da las bovas devastantas en la Bregaglia la fin d'avust 2017 sco er l'acziun per cumbatter ils incendis da guaud en la Val Mesauc ed en la Val Calanca tranter il december 2016 ed il schaner 2017. Cusseglier guvernativ Christian Rathgeb ha ludà la stupenta collavuraziun ed ha exprimì ses engraziament per l'agid prestà.
Fotografia agiuntada:
Da sanestra a dretga:
Retscha 1: cumandant da corp Aldo C. Schellenberg, cusseglier guvernativ Christian Rathgeb, divisiunari Lucas Caduff
Retscha 2: brigadier Willy Brülisauer , Regula Hunger, secretaria dal departament da giustia e segirezza, brigadier Franz Nager, brigadier Peter Baumgartner
Retscha 3: litinent colonel Martin Candrian, schef dal stab territorial chantunal da colliaziun dal Grischun, Hans Peter Risch, manader dal servetsch giuridic sanadad e protecziun da la populaziun, litinent colonel Andreas Kieni, cumandant cirquital GR, Martin Bühler, manader da l'uffizi da militar e da protecziun civila
Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01, e-mail Christian.Rathgeb@djsg.gr.ch
Gremi: departament da giustia, segirezza e sanadad
Funtauna: rg departament da giustia, segirezza e sanadad