La presidenta da la regenza Barbara Janom Steiner ha profità da ses segund onn presidial per sa procurar ina impressiun concreta da la realisaziun da la refurma dal territori. En il decurs da quest onn ha ella visità tut las 11 regiuns. En il center èn stads en quest connex ils contacts cun las presidentas communalas e cun ils presidents communals che furman la conferenza da las presidentas e dals presidents da las regiuns.

Cun la refurma chantunala dal territori èn vegnidas stgaffidas 11 regiuns sco corporaziuns territorialas che ston avair remplazzà fin il pli tard la fin da l’onn 2017 las 14 corporaziuns regiunalas, ils 11 districts ed ils 39 circuls. Dapi il 1. da schaner 2016 sviluppa la refurma dal territori ses effect cumplain. Dapi lura lavuran las 11 novas regiuns en moda operativa. Cun la refurma dal territori ha il chantun vulì stgaffir regiuns ch'èn ablas da decider e d'agir e che pon uschia ademplir lur incumbensas en moda effizienta, svelta sco er manaivla als burgais. La concepziun ch'è decisiva per las 11 regiuns sa cumprovescha sco ch'i para en la pratica, sco che las visitas han mussà.

Bun barat d'experientschas e d'ideas
Ils 16 da mars 2017 han questas visitas cumenzà en la regiun Malögia, ils 30 da november 2017 èn ellas idas a fin en la regiun Partenz/Tavau. Tranteren en vegnidas visitadas las regiuns Plessur (8 da matg), Moesa (11 da matg), Surselva (15 da matg), Alvra (17 da matg), Viamala (30 da matg), Landquart (16 da zercladur), Bernina (26 da zercladur), Engiadina bassa/Val Müstair (18 d‘avust) e Plaun (3 da november). Il barat direct cun las presidentas ed ils presidents ha permess d’emprender ad enconuscher ils problems, ils quitads ed ils giavischs da las vischnancas en connex cun l’organisaziun da la regiun e cun l’adempliment da las incumbensas regiunalas. Er temas che van sur quai ora èn vegnids tractads, en spezial er tals che pertutgan l’activitad da l’administraziun chantunala.

Facit positiv
La presidenta da la regenza ha pudì sa persvader che las regiuns funcziunan senza problems e che la midada è en general vegnida realisada bain. Cun l’onn 2017 che va a fin vegnan er anc abolids ils ultims dus circuls ch’existan anc (Engiadin’ota, Mesauc). Cun la finiziun da las lavurs da liquidaziun per las corporoaziuns regiunalas che n’èn anc betg stadas abolidas (Engiadin’ota, Pro Partenz, Val Puschlav) po la refurma dal territori vegnir designada sco realisada cun success.

In video da la chanzlia chantunala dal Grischun resumescha ils resultats e las impressiuns las pli interessantas da las visitas. Ina camera ha accumpagnà la presidenta da la regenza tar sia ultima visita en la regiun Partenz/Tavau.


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01, e-mail Barbara.Janom@dfg.gr.ch


Gremi: regenza
Funtauna: rg chanzlia chantunala dal Grischun