La regenza ha deliberà il sboz tar ina revisiun parziala da la lescha chantunala d'energia per la consultaziun. Il punct central dal project da revisiun è l'adattaziun da las prescripziuns da construcziun energeticas al model repassà da prescripziuns davart l'energia dals chantuns (MoPEC).

La finamira da la nova versiun dal model da prescripziuns (MoPEC 2014) che la conferenza dals directurs chantunals d'energia ha deliberà ils 9 da schaner 2015 è il "nearly zero energy building". In tal edifizi sto vegnir construì uschia, ch'i al sto vegnir furnì en il decurs da l'onn "quasi nulla" energia. Cuntanschida vegn questa finamira tras las pretensiuns che vegnan fatgas envers la cuvrida dal basegn da chalur d'edifizis novs sco er envers l'utilisaziun pli effizienta da l'energia duvrada. Plinavant vegn prendì en mira in ulteriur augment da la quota d'energias regenerablas e pretendì, ch'edifizis novs sa provedian durant l'entir onn uschè bain sco pussaivel sezs cun energia termica e per ina part adequata cun electricitad. Ils standards definids uschia dal MoPEC 2014 sa chattan effectivamain tranter il standard da MINERGIE 2009 e quel d'edifizis da MINERGIE-P.

Las prescripziuns dal MoPEC èn recumandaziuns per la realisaziun concreta en il dretg chantunal da construcziun e d'energia e sa basan sin vastas experientschas executivas fatgas en ils chantuns. Per cuntanscher vinavant la finamira da prescripziuns da construcziun armonisadas en ils chantuns, sto il model da prescripziuns vegnir integrà en las legislaziuns chantunalas. Cun questa revisiun parziala da la lescha d'energia vul la regenza far las adattaziuns necessarias, e quai resguardond las relaziuns concretas en il Grischun. L'uschenumnà "modul da basa" duai vegnir integrà en la lescha d'energia dal chantun Grischun. Dals "moduls supplementars" dal MoPEC 2014 vegni proponì da realisar quels che vegnan giuditgads sco mesiras spezialmain effectivas.

In ulteriur punct da revisiun è la creaziun d'ina basa per promover l'electromobilitad. Quai vegn fatg cun exequir il pachet da mesiras correspundent che la regenza ha deliberà. Concretamain duai vegnir stgaffida ina basa giuridica expressiva per pudair pajar contribuziuns da promoziun a favur d'infrastructuras per chargiar vehichels electrics e francada la funcziun d'exempel dal chantun en quest sectur.

La consultaziun dura fin ils 30 da mars 2018. Ils documents pon vegnir consultads en l'internet sut www.gr.ch > Rumantsch > Publicaziuns > Consultaziuns > Consultaziuns currentas.


Infurmaziuns:
- cusseglier guvernativ dr. Mario Cavigelli, schef dal departament da construcziun, traffic e selvicultura, tel. 081 257 36 01, e-mail Mario.Cavigelli@bvfd.gr.ch
- Erich Büsser, manader da l'uffizi d'energia e da traffic, tel. 081 257 36 21, e-mail Erich.Buesser@aev.gr.ch


Gremi: regenza
Funtauna: rg departament da construcziun, traffic e selvicultura