Per il proxim onn da scola 2018/19 vegn introducì en las scolas il Plan d'instrucziun 21 GR. Spezialmain en il sectur "Medias ed informatica" èsi impurtant per las scolas da sa preparar bain sin las sfidas che spetgan. Ils ultims mais ha il chantun perquai accumpagnà las scolas cun ina vasta purschida da sustegn.

L'uffizi per la scola populara ed il sport (USS) ha organisà numerusas occurrenzas d'infurmaziun e cussegliaziuns sin basa d'in concept detaglià davart la realisaziun dal Plan d'instrucziun 21 en il chantun Grischun. Questas mesiras èn vegnidas concepidas en differents secturs per tut las 2650 persunas d'instrucziun, las 120 direcziuns da scola ed ils 230 commembers da las autoritads da scola da la scola populara. Las reacziuns dals conturns da la scola èn stadas da princip positivas, betg sco ultim perquai ch'i n'èn betg vegnidas organisadas occurrenzas grondas mabain occurrenzas en las regiuns linguisticas e cussegliaziuns individualas.

Differents manuals d'agid
Ultra da las mesiras menziunadas èn vegnids elavurads manuals davart ils temas "Diagnosa, promover, valitar" sco er "Medias ed informatica". In ulteriur manual davart l'individualisaziun en las 3. classas dal stgalim secundar I è actualmain en elavuraziun. Questas basas vegnan resguardadas en las furmaziuns supplementaras correspundentas da la scola auta da pedagogia dal Grischun (SAPGR) ch'il USS ha incumbensà. Sin giavisch da las scolas vegnan questas purschidas approfundadas al lieu da l'inspecturat da scola. Er vegnan las scolas sustegnidas cun materialias en il sectur da las infurmaziuns per ils geniturs. Sin giavisch da l'associaziun Magistraglia Grischun (LEGR), da la federaziun da mainascolas dal Grischun (FMSGR), da la conferenza da las instituziuns d'uffants e da giuvenils (CUG) da la federaziun grischuna "chasas ed ospitals" sco er da l'associaziun dals cussegls da scola dal Grischun (ACSG) ha il USS concepì in set per l'infurmaziun dals geniturs. Quel po vegnir duvrà da las scolas tenor plaschair per occurrenzas d'infurmaziun.

Sectur "Medias ed informatica" en il focus
Cun il manual "Medias ed informatica" stat a disposiziun a las scolas ina basa da planisaziun professiunala per realisar il plan d'instrucziun dal modul. En quel vegnan fixadas las finamiras da l'instrucziun ch'èn liantas per tut ils stgalims da scola (stgalims da cumpetenza) sco er las recumandaziuns giavischadas areguard l'infrastructura e l'equipament. Quest servetsch vegn stimà fitg en spezial da las autoritads e da las direcziuns da scola. Supplementarmain a la purschida dal USS organisescha la SAPGR per incumbensa da l'uffizi numerusas furmaziuns supplementaras obligatoricas per persunas d'instrucziun. Las furmaziuns supplementaras obligatoricas per il rom "Medias ed informatica" han cumenzà la fin da favrer 2018.

Oravant tut cun ils manuals èn vegnidas elavuradas en secturs impurtants da la realisaziun basas en tut las trais linguas chantunalas. Quellas duain contribuir ad ina introducziun armonisada e facilitar la realisaziun a las scolas.


Infurmaziuns:
- cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch
- Nicole Merz, direcziun dal project Plan d'instrucziun 21 GR, uffizi per la scola populara ed il sport, tel. 081 257 30 60, e-mail Nicole.Merz@avs.gr.ch


Gremi: departament d'educaziun, cultura e protecziun da l'ambient
Funtauna: departament d'educaziun, cultura e protecziun da l'ambient